पाँच महिनाको उपचारपछि स्वदेश फर्किए पूर्वप्रधानमन्त्री देउवा
काठमाडौं- नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा पाँच महिना लामो स्वास्थ्य उपचारपछि आज स्वदेश फर्किएका छन्। गत भदौ २४ गते भएको जेनजी आन्दोलनमा उनी गम्भीर घाइते भएका थिए। त्यसपछि उनी उपचारका लागि सिङ्गापुर हुँदै हङकङ गएका थिए। आज दिउँसो काठमाडौँ आइपुगेका उनलाई कांग्रेसका शीर्ष नेता र सयौँ कार्यकर्ताले विमानस्थलमा स्वागत गरे।
स्वदेश फर्किएपछि उनले एक अपिल जारी गर्दै आफू नेता मात्र नभई एक आजीवन नागरिकको रूपमा देशको सेवा गर्न तयार रहेको बताए। युवा पुस्ताको आवाजलाई कांग्रेसले आत्मसात् गरेको र समयअनुसार परिवर्तन हुन पार्टी तयार रहेको उनले प्रस्ट पारे। घाइते हुँदा पनि आफूले युवाहरूको जायज माग सम्बोधन गर्नुपर्ने कुरा त्यतिबेलै राखेको उनले स्मरण गरे।
देउवाले आफ्नो विगतको अनुभव नयाँ पुस्तालाई बाँड्ने जिम्मेवारी आफ्नो भएको बताएका छन्। निराश भएका कार्यकर्ताको मनोबल बढाउनुपर्ने भन्दै उनले वि.सं. २०३३ सालमा विपी कोइराला फर्कंदा जस्तै अहिले पनि सबै मिलेर राष्ट्रिय एकता बलियो बनाउनुपर्नेमा जोड दिए। उनले आफूले सधैँ देश, कानुन र लोकतन्त्रलाई मानेर काम गरेको भन्दै जीवन रहुन्जेल यस्तै इमानदारिताका साथ काम गर्ने प्रतिबद्धता जनाए।
