अमेरिकी राष्ट्रिय ऋण इतिहासमै पहिलो पटक ४० ट्रिलियन डलर पुग्यो
वाशिङ्टन – संयुक्त राज्य अमेरिकाको राष्ट्रिय ऋण इतिहासमै पहिलो पटक ४० ट्रिलियन (४० लाख करोड) अमेरिकी डलर नाघेको छ। रक्षा बजेट, सामाजिक सुरक्षा, स्वास्थ्य कार्यक्रम तथा बढ्दो बजेट घाटाको ब्याज भुक्तानीमा अत्यधिक खर्च भएकाले ऋणले नयाँ रेकर्ड बनाएको हो।
पछिल्ला केही महिनायता अमेरिकी ऋण निकै तीव्र गतिमा बढिरहेको छ। गत मार्च महिनामा ३९ ट्रिलियन डलर पुगेको ऋण पाँच महिनाभित्रै बढेर ४० ट्रिलियन डलर पुगेको हो।
ह्वाइट हाउसका प्रवक्ता कुश देसाईले सरकारले अनावश्यक खर्च घटाउन र आर्थिक वृद्धिलाई गति दिन काम गरिरहेको बताएका छन्। अर्कोतर्फ, अर्थविद्हरूले भने बढ्दो ऋणका कारण घर तथा गाडी कर्जाको ब्याजदर बढ्ने, महँगी चुलिने र सर्वसाधारणको दैनिकीमा प्रत्यक्ष असर पर्ने चेतावनी दिएका छन्।
पिटर जी पिटरसन फाउन्डेसनका प्रमुख माइकल ए पिटरसनले देशको अर्थतन्त्रलाई दिगो र सन्तुलित बनाउन नीति निर्माताहरूले तत्काल ठोस कदम चाल्नुपर्ने बताएका छन्। यस्तै, बाइपार्टिसन पोलिसी सेन्टरले पनि अनियन्त्रित ऋणले अमेरिकी अर्थतन्त्रलाई दीर्घकालीन संकटतर्फ धकेल्न सक्ने भन्दै सचेत गराएको छ।
महामारीका बेला दिइएका राहत, कर कटौती तथा उच्च सरकारी खर्चका कारण अमेरिकी ऋण लामो समयदेखि बढ्दै गएको हो। ऋणको कानुनी सीमा पुनरावलोकन नगरिए आगामी दिनमा अमेरिकी अर्थतन्त्रले थप चुनौती बेहोर्नुपर्ने विश्लेषण गरिएको छ।
