अमेरिकाको आप्रवासी भिसामा नयाँ नियम: ‘पब्लिक चार्ज बन्ड’ राख्नुपर्ने
न्युयोर्क- अमेरिकाले आप्रवासी भिसा (इमिग्रान्ट भिसा) का लागि आवेदन दिने केही व्यक्तिहरूका लागि नयाँ नियम ल्याएको छ। यसअन्तर्गत अब कन्सुलर अधिकारीले चाहेमा आवेदकलाई ‘पब्लिक चार्ज बन्ड’ राख्न लगाउन सक्छन्। यो नियम अहिले परीक्षणको रूपमा लागू गरिएको छ।
अमेरिकी विदेश मन्त्रालयका अनुसार अमेरिका बसाइँ सर्नु अधिकार नभई एउटा अवसर हो। त्यसैले, आवेदकले आफू अमेरिकाको लागि आर्थिक बोझ नबन्ने प्रमाणित गर्नुपर्छ। पहिले नै आर्थिक बोझ बन्न सक्ने भन्दै भिसा अस्वीकार भएका व्यक्तिहरूले पनि यो बन्ड राखेर भिसा पाउन सक्ने नयाँ बाटो खुलेको छ।
बन्डको रकम कति हुने भन्ने कुरा अधिकारीहरूले प्रत्येक व्यक्तिको अवस्था हेरेर तोक्छन्। यो नियमले अहिले चलिरहेको वैध भिसालाई कुनै असर गर्दैन। साथै, पछि यो बन्डवापत तिरेको रकम नियमअनुसार फिर्ता पाउन सकिन्छ। यो प्रक्रिया छानिएका आवेदनहरूमा मात्र लागू हुनेछ र अधिकारीले नै कसले बन्ड राख्ने भनेर आवेदकलाई जानकारी दिन्छन्।
