भोटेकोसी बाढीः १० हजारभन्दा बढीको उद्धार, ४ हजार अझै बेपत्ता
काठमाडौं- रसुवाको भोटेकोसी नदीमा भदौ १० गते आएको विनाशकारी बाढीपछि प्रभावित क्षेत्रबाट १० हजार ४५१ जनाको उद्धार गरिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार नेपाली सेनाले ३ हजार ३४४ नेपाली र २५२ विदेशी नागरिकको हवाई उद्धार गरेको छ। भदौ १४ गते मात्रै जलविद्युत आयोजना क्षेत्रमा फसेका १५ चिनियाँ र ७ भारतीय नागरिकको उद्धार गरिएको छ।
प्राधिकरणकी प्रवक्ता शान्ति महतले बाढीमा ज्यान गुमाएका ९०३ जनाको शव फेला परेको बताइन्। उनका अनुसार अझै ४ हजार २४७ जना सम्पर्कविहीन छन्। प्रभावित क्षेत्रमा बेपत्ता भएकाहरूको खोजी र उद्धारका लागि हालसम्म ४११ पटक हवाई उडान गरिएको छ। बाढीका कारण रसुवा, नुवाकोट, धादिङ, गोरखादेखि चितवन र नवलपरासीसम्मका जिल्ला प्रभावित भएका छन्।
खोज तथा उद्धार कार्यमा नेपाली सेना, नेपाल प्रहरी र सशस्त्र प्रहरी गरी जम्मा २० हजार ८१९ जना सुरक्षाकर्मी खटिएका छन्। बाढीपीडितका लागि खाद्यान्न, लत्ताकपडा, औषधि र स्वास्थ्य सामग्री पठाउने काम निरन्तर भइरहेको प्रवक्ता महतले जानकारी दिइन्।
