नयाँदिल्लीमा भवन भत्किँदा ६ जनाको मृत्यु, उद्धार कार्य जारी

नयाँदिल्लीको सत्य निकेतन क्षेत्रमा एउटा पाँचतले भवन भत्किँदा ६ जनाको मृत्यु भएको छ। दिल्ली विश्वविद्यालय नजिकै रहेको विद्यार्थी आवास क्षेत्रको यो भवन आइतबार भत्किएको हो। सोमबार दोस्रो दिन पनि भग्नावशेषमा मानिस फसेको आशङ्कामा उद्धारकर्मीहरूले खोजी जारी राखेका छन्।

प्रहरी, अग्नि नियन्त्रक र विपद् उद्धार टोलीले मेसिन र तालिमप्राप्त कुकुरको सहयोगमा उद्धार गरिरहेका छन्। मुख्यमन्त्री रेखा गुप्ताले भग्नावशेषबाट १२ जनाको उद्धार गरिएको र ६ जना घाइते भएको बताइन्। उनका अनुसार अहिलेसम्म करिब ८० प्रतिशत भग्नावशेष हटाइसकिएको छ।

करिब ५५ वर्ष पुरानो उक्त भवनमा मर्मतको काम भइरहेको थियो। जमिनमुनिको तल्लामा पानी जम्नु र मर्मत गर्दा संरचना कमजोर भएकाले भवन भत्किएको हुन सक्ने मुख्यमन्त्री गुप्ताले बताइन्। यो घटनापछि त्यहाँको सरकारले विद्यार्थी आवास, विद्यालय र नर्सिङ होम जस्ता सार्वजनिक प्रयोगका भवनमा नियमित सुरक्षा परीक्षण गर्नुपर्ने नियम अनिवार्य गर्ने तयारी गरेको छ। मनसुनका बेला भारी वर्षा हुँदा पुराना भवनहरू भत्किने जोखिम धेरै हुने गर्छ।