चिलिमे जलविद्युतमा ज्यान गुमाएका पाँचै कर्मचारीको शव परिवारलाई बुझाइयो

काठमाडौं- रसुवाको चिलिमे जलविद्युत् केन्द्रमा फसेका पाँच जना कर्मचारीको शव आज उनीहरूका परिवारलाई बुझाइएको छ। भोटेकोसी नदीमा आएको बाढीमा परेर ज्यान गुमाएका उनीहरूको शव पहिचान गरेर परिवारको जिम्मा लगाइएको हो।

चिलिमे जलविद्युत् कम्पनीका प्रबन्ध निर्देशक बाबुराजा महर्जनका अनुसार इन्जिनियर सन्तोष पाण्डे, विद्युत् प्राविधिक मीनराज मोक्तान, पालेहरू श्यामबहादुर थापामगर र तिलकबहादुर थापामगर तथा विद्युत् प्राधिकरणका कर्मचारी लाक्पा तामाङको शव भेटिएको हो। यी शवहरू बुधबार दिउँसो सुरुङभित्रको नियन्त्रण कक्ष आसपासमा फेला परेका थिए। शवहरूलाई नेपाली सेनाको हेलिकप्टरमार्फत नुवाकोट लगेर परिवारलाई दिइएको उनले बताए।

बाढीले जलविद्युतको सुरुङ पुर्नुका साथै ११ मेगावाटका दुईवटा टर्बाइनसहित सबै संरचना पूर्ण रूपमा नष्ट गरेको छ। उद्धारका लागि नेपाली सेनाको नेतृत्वमा भारतीय सेना, सशस्त्र प्रहरी र प्राधिकरणका कर्मचारीहरू खटिएका थिए।

यसैबीच, रसुवाका प्रमुख जिल्ला अधिकारी कमलप्रसाद पाण्डेले खोज, उद्धार र राहत बाँड्ने काम चलिरहेको बताए। क्षतिको विवरण संकलन गर्न एक महिनाको समय दिएर २५ सदस्यीय समिति गठन गरिएको छ। मानिसहरूलाई आउजाउ गर्न सजिलो होस् भनेर नदीमा तुइन र फड्के हालिएको छ। यसका साथै बाढीपछि फैलन सक्ने महामारी र रोगहरू रोक्न आवश्यक औषधि र स्वास्थ्यकर्मीको व्यवस्था पनि मिलाइएको उनले जानकारी दिए।