चिनियाँ राष्ट्रपति सीलाई स्वागत गर्न ट्रम्प आफैँ विमानस्थल पुग्ने, आजदेखि तीन दिने अमेरिका भ्रमण सुरु
वासिङ्टन- चिनियाँ राष्ट्रपति सी जिनपिङ आफ्नो तीन दिने राजकीय भ्रमणका लागि आज बुधबार अमेरिकाको वासिङ्टन आइपुग्दै छन्। एक दशकभन्दा बढी समयपछि अमेरिकाको राजकीय भ्रमणमा आउन लागेका सीलाई स्वागत गर्न अमेरिकी राष्ट्रपति डोनाल्ड ट्रम्प आफैँ विमानस्थल पुग्ने भएका छन्।
राष्ट्रपति ट्रम्पले ह्वाइट हाउसमा कुरेर बस्नुको सट्टा जोइन्ट बेस एन्ड्रयुज विमानस्थलमै पुगेर सीलाई स्वागत गर्ने दुर्लभ सम्मान देखाउन लागेका हुन्। प्रथम महिला मेलानिया ट्रम्पले दुई नेताबिचको राम्रो सम्बन्ध र सम्मानका कारण यस्तो निर्णय गरिएको बताएकी छन्।
यो भ्रमणलाई कूटनीतिक र राजकीय हिसाबले अत्यन्तै भव्य बनाइने अपेक्षा गरिएको छ। बिहीबार ह्वाइट हाउसमा सीको सम्मानमा विशेष रात्रिभोज आयोजना गरिनेछ, जहाँ एनभिडियाका जेन्सन हुवाङ र स्पेसएक्सका एलन मस्क लगायतका दिग्गज व्यापारीहरु पनि सहभागी हुनेछन्। व्यापार, कृत्रिम बुद्धिमत्ता (एआई), इरान र ताइवान जस्ता महत्वपूर्ण विषयमा दुई देशबीच तनाव रहे पनि यो भ्रमणले सम्बन्धलाई स्थिर राख्न मद्दत गर्ने विश्वास लिइएको छ।
यद्यपि, केही अमेरिकी सांसदले भने इरानलाई चीनको समर्थन र सैन्य विस्तारको विषय उठाउँदै यस्तो भव्य स्वागतको आलोचना गरेका छन्। शुक्रबार सी र उनकी पत्नी पेङ लियुआनले ट्रम्प दम्पतीसँग ह्वाइट हाउसमा चियापान गर्दै वासिङ्टनस्थित राष्ट्रिय अभिलेखालयको भ्रमण गर्ने कार्यक्रम छ।
