प्रधानमन्त्री शाह र राष्ट्रसंघ महासचिव गुटेरेसबीच भेट: भोटेकोशी विपद् र जलवायु संकटबारे छलफल
न्युयोर्क- संयुक्त राष्ट्रसंघको ८१ औँ महासभामा सहभागी हुन न्युयोर्क पुगेका प्रधानमन्त्री वालेन्द्र शाह र राष्ट्रसंघका महासचिव एन्टोनियो गुटेरेसबीच भेटवार्ता भएको छ। महासभालाई सम्बोधन गर्नुअघि प्रधानमन्त्री शाहले राष्ट्रसंघ मुख्यालयमा महासचिव गुटेरेससँग भेट गरेका हुन्।
भेटमा प्रधानमन्त्री शाहले रसुवाको भोटेकोशी नदीमा आएको विपद्बाट ठूलो क्षति भएको उल्लेख गर्दै नेपालमा हिमताल फुट्ने जोखिम अझै उच्च रहेको बताए। महासचिव गुटेरेसले बाढीपहिरोमा भएको जनधनको क्षतिप्रति दुःख व्यक्त गरे। जलवायु परिवर्तनको असरसँग जुध्न राष्ट्रसंघ नेपालको साथमा रहेको भन्दै उनले युवा नेपाली टोलीको प्रशंसा गरे।
महासचिव गुटेरेसले सन् १९७८ मा पर्यटकका रूपमा नेपाल घुमेको सम्झँदै आफ्नो कार्यकाल सकिएपछि पनि नेपाललाई निरन्तर सहयोग गर्ने बताए।
भेटवार्तामा नदी किनारका बासिन्दाको पुनर्वास, हरित पुनर्निर्माण र नेपाल अतिकम विकसित देशबाट स्तरोन्नति हुने समयसीमा बढाउने विषयमा पनि कुराकानी भएको छ।
