राष्ट्रसङ्घमा प्रधानमन्त्री शाहको सम्बोधन : जलवायु सङ्कटको मुद्दाले पायो विज्ञको प्रशंसा
न्युयोर्क- प्रधानमन्त्री वालेन्द्र शाहले संयुक्त राष्ट्रसङ्घको ८१औँ महासभामा गरेको सम्बोधनलाई परराष्ट्र मामिलाका विज्ञहरूले रुचाएका छन् । जलवायु परिवर्तनबाट बढ्दो जोखिमलाई विश्व मञ्चमा गहकिलो ढङ्गले प्रस्तुत गरेको भन्दै उनीहरूले प्रधानमन्त्रीको प्रशंसा गरेका हुन् ।
प्रधानमन्त्री शाहले हालैको भोटेकोशी–त्रिशूली विपद्लाई नेपालको मात्र नभई विश्वकै लागि जलवायु सङ्कटको चेतावनीका रूपमा प्रस्तुत गरेका थिए । उनले नेपालले भोगिरहेको असरलाई ‘हिमाली सुनामी’ को सङ्ज्ञा दिँदै नेपाल, भारत र चीनको नेतृत्वमा हिमाली जलवायु प्रतिरोधी संयन्त्र स्थापना गर्न प्रस्तावसमेत राखेका छन् ।
पूर्वपरराष्ट्रमन्त्री एनपी साउदले जलवायु परिवर्तनको जोखिम विश्वको साझा सवाल भएको विषय सम्बोधनमा प्रभावकारी रूपमा आएको बताए । उनले भने, “यसले महासचिव एन्टोनियो गुटेरेसको नेपाल भ्रमणका बेला उठेका सवाललाई थप बल पुर्याएको छ ।”
अन्तर्राष्ट्रिय सम्बन्धका जानकार प्रा. डा. खड्गबहादुर केसी र डा. दिनेश भट्टराईले पनि विश्व मञ्चमा नेपालको समसामयिक मुद्दा बलियो गरी उठेको बताए । डा. भट्टराईले ‘किसानको खेतमा मल पुग्दैन, तर मिसाइलहरू विश्वमा द्रुत गतिमा पुगिरहेका छन्’ भन्ने प्रधानमन्त्रीको भनाइ निकै प्रभावकारी भएको उल्लेख गरे । यद्यपि, सम्बोधनमा प्रयोग भएको ‘योङ नेसन’ भन्ने शब्दप्रति भने प्रा. डा. केसीले असहमति जनाउँदै नेपाल विश्वकै पुरानो सभ्यता भएको बताए । डा. भट्टराईले भने युवा जनसङ्ख्या र युवा सरकारलाई लक्षित गरी उक्त शब्द प्रयोग भएको हुन सक्ने अनुमान गरे ।
सम्बोधनको अन्त्यमा प्रधानमन्त्री शाहले ‘पशुपतिनाथले विश्वको रक्षा गरुन् र विश्व बुद्धको सन्देशमा हिँडोस्’ भनी दिएको सन्देशलाई विज्ञहरूले अर्थपूर्ण मानेका छन् । लैङ्गिक तथा समावेशीकरण विज्ञ भारती सिलवालले पनि यो सम्बोधन युद्धमा अल्झिएको विश्वका लागि गम्भीर चेतावनीको घण्टी भएको बताइन् । विपद्ले कुनै राजनीतिक सीमा नचिन्ने भएकाले प्रधानमन्त्रीको सन्देशले विश्व समुदायको ध्यान खिच्न सफल भएको उनको भनाइ छ ।
