पर्वतमा बाढीपहिरोबाट ३०० परिवार विस्थापित, १७० घर पूर्ण रूपमा नष्ट
पर्वत जिल्लामा बाढीपहिरोका कारण ३०० परिवार विस्थापित भएका छन्। जिल्ला प्रशासन कार्यालयका अनुसार विपत्तिमा परी १७० घर पूर्ण रूपमा र १३१ घरमा आंशिक क्षति पुगेको छ। जिल्लाका सातमध्ये छ वटा पालिका प्रभावित भएकोमा जलजला गाउँपालिका सबैभन्दा बढी मारमा परेको छ, जहाँ मात्रै १७१ परिवार विस्थापित भएका छन् र ११३ घरमा ठूलो क्षति पुगेको छ। अन्य पालिकाहरू कुश्मा, फलेवास, बिहादी, महाशिला र मोदीमा पनि भौतिक क्षति भएको छ।
बाढीपहिरोले नागरिकका घरका अतिरिक्त ५ वटा विद्यालय भवन, स्वास्थ्य तथा प्रहरी चौकी, मन्दिर र कृषि फार्मलगायतका संरचनामा क्षति पुर्याएको छ। यसका साथै पर्वत र बागलुङ जोड्ने झोलुङ्गे पुल तथा मध्यपहाडी लोकमार्गको मालढुङ्गा पुलमा पनि क्षति पुगेको छ भने ग्रामीण सडक र कालीगण्डकी लोकमार्गका विभिन्न खण्डहरू अवरुद्ध छन्।
प्रमुख जिल्ला अधिकारी गङ्गाबहादुर क्षेत्रीका अनुसार, विस्थापित परिवारहरूलाई स्थानीय प्रशासन, नेपाल रेडक्रस सोसाइटी र विभिन्न सामाजिक सङ्घसंस्थाको समन्वयमा त्रिपाल, खाद्यान्न, लत्ताकपडा र स्वास्थ्य सामग्रीलगायतका अत्यावश्यक राहत वितरण भइरहेको छ।
