कांग्रेसको १५औँ महाधिवेशन: भारी मतसहित गगन थापा सभापतिमा निर्वाचित, पार्टी एकढिक्का बनाउने मुख्य चुनौती
काठमाडौँ – नेपाली कांग्रेसको १५औँ महाधिवेशनबाट गगन थापा अत्यधिक बहुमतका साथ पार्टी सभापतिमा निर्वाचित भएका छन्।
शनिबार सम्पन्न मतगणनाअनुसार थापाले कुल ६ हजार ५ सय ८४ (९३.८८ प्रतिशत) मत प्राप्त गर्दै विजयी भएका हुन्। उनका प्रतिद्वन्द्वी श्यामकृष्ण खड्गीले ३ सय ७५ (५.३५ प्रतिशत) मत मात्र प्राप्त गरेको केन्द्रीय निर्वाचन समितिले जनाएको छ। थापाले खड्गीभन्दा ६ हजार २ सय ९ मत बढी ल्याएका हुन्।
थापाको जितसँगै कांग्रेसका अन्य नेताहरूले उनलाई बधाई तथा शुभकामना दिएका छन्। निर्विरोध वरिष्ठ उपसभापति बनेका विश्वप्रकाश शर्मा, नेताहरू प्रदीप पौडेल र उदय शमशेर राणाले नवनिर्वाचित सभापतिलाई सफल कार्यकालको शुभकामना दिँदै पार्टीभित्रका भिन्न मत र मनहरूलाई जोडेर अघि बढ्नुपर्नेमा जोड दिएका छन्। उनीहरूले देश र पार्टी रूपान्तरणको सङ्कल्प पूरा गर्न एकजुट भएर लाग्ने प्रतिबद्धतासमेत व्यक्त गरेका छन्।
राजनीतिक विश्लेषकहरूका अनुसार कानुनी रूपमा नेतृत्व प्राप्त गरे पनि राजनीतिक रूपमा विभाजित कांग्रेसलाई एकताबद्ध गर्नु नै थापाको मुख्य चुनौती हो। राजनीतिक विश्लेषक चन्द्र किशोरका अनुसार गगन थापाले युवा पुस्तासँग संवाद बढाउँदै पुराना पुस्ताको योगदानको सम्मान हुने वातावरण बनाउनुपर्नेछ।
“महाधिवेशनमा छुटेका नेता–कार्यकर्तालाई मूलधारमा ल्याएर पार्टीलाई एकढिक्का बनाउनु नयाँ नेतृत्वको बाध्यता र आवश्यकता दुवै हो,” विश्लेषक चन्द्र किशोरले भने। असन्तुष्ट पक्षका गुनासा सम्बोधन गर्दै जनविश्वास बढाउनु थापाको अग्निपरीक्षा हुने विश्लेषकहरूको भनाइ छ।
गत पुसमा काठमाडौँमा भएको विशेष महाधिवेशनबाट थापा सभापतिमा निर्विरोध चयन भएका थिए। निवर्तमान सभापति शेरबहादुर देउवा पक्षले उक्त भेलालाई अवैधानिक भने पनि सर्वोच्च अदालत र निर्वाचन आयोगले थापा नेतृत्वको कार्यसमितिलाई नै वैधानिकता दिएपछि अहिले १५औँ महाधिवेशन सम्पन्न भएको हो।
देउवा समूहले छुट्टै महाधिवेशनको घोषणा गर्दै समानान्तर गतिविधि गरिरहेको भए पनि यसअघि देउवा निकट मानिएका बालकृष्ण खाँड, ज्ञानेन्द्रबहादुर कार्की, महालक्ष्मी उपाध्याय लगायतका थुप्रै नेताहरू भने गगन थापा नेतृत्वकै महाधिवेशनमा सहभागी भएका छन्।
