दशैँमा मानिसहरु गाउँ फर्किएपछि काठमाडौं सुनसान
बडादशैँ मनाउन लाखौँ मानिस आफ्नो गाउँ फर्किएपछि काठमाडौं उपत्यका सुनसान बनेको छ। सधैँ भिडभाड हुने सडक, व्यापारिक केन्द्र र सार्वजनिक ठाउँहरु यतिबेला चकमन्न छन्।
घटस्थापनादेखि नै उपत्यकाका मुख्य नाका हुँदै मानिसहरु बाहिरिन थालेका हुन्। सधैँ जाम हुने बानेश्वर, कोटेश्वर, रत्नपार्क र कलंकी जस्ता व्यस्त चोकमा अहिले गाडीको चाप एकदमै कम छ। सडकमा थोरै मात्र गाडी गुडेका छन् भने अधिकांश पसल तथा कार्यालयहरु बन्द छन्।
मानिसहरु गाउँ गएपछि रित्ता भएका घरबस्तीमा चोरी र लुटपाट हुन नदिन प्रहरीले सुरक्षा व्यवस्था कडा पारेको छ। टोलटोलमा प्रहरीको गस्ती र निगरानी बढाइएको छ। कोजाग्रत पूर्णिमापछि मात्र मानिसहरु फर्किने भएकाले काठमाडौं अझै केही दिन यस्तै शान्त रहनेछ।
