स्विस लेकसाइड पार्कमा नग्न पुरुषद्वारा महिला जगरको हत्या
स्विट्जरल्यान्डको लेकसाइड पार्कमा एक नग्न व्यक्तिले चिच्याउँदै मानिसहरूमाथि हमला गर्दा एक महिला जगरको मृत्यु भएको प्रहरीले बुधबार बताएको छ ।
स्विट्जरल्यान्डको सबैभन्दा ठूलो सहरबाट करिब २० किलोमिटर दक्षिणपूर्वमा जुरिच तालमा रहेको मान्नेडोर्फमा मङ्गलबार बेलुका उक्त हमला भएको जुरिच क्यान्टोनल प्रहरीले बतायो । उन्नाइस वर्षीय एक संदिग्धलाई पक्राउ गरिएको छ ।
“मङ्गलबार बेलुका मान्नेडोर्फमा एक व्यक्तिले महिलामाथि हमला गर्यो र उनलाई गम्भीर घाइते बनायो, ती महिला जगिङका लागि निस्किएकी थिइन्”, प्रहरीले भनेको छ, “साँझ ८ बजेभन्दा केही समयअघि बटुवाहरूले अल्मा पार्कमा एक नग्न व्यक्ति यताउता भागिरहेको र चिच्याउँदै अन्य मानिसमाथि शारीरिक हमला गरिरहेको सूचना दिए ।”
“आपत्कालीन सेवाहरू तुरुन्तै घटनास्थलमा पुग्यो र गम्भीर घाइेत महिलालाई भुइँमा लडेको फेला पार्यो, तत्काल होसमा आए पनि गम्भीर चोटका कारण उनको मृत्यु भयो”, प्रहरीले भनेको छ, “घटनास्थलमा फेला परेका १९ वर्षीय संदिग्ध अपराधीलाई प्रहरीले पक्राउ गरेको छ ।”
पीडितको पहिचानका लागि अनुसन्धान भइरहेको प्रहरीले जनाएको छ । हमलाको पृष्ठभूमि तथा पीडक र पीडित एकअर्काबीच परिचित थिए वा थिएनन् भन्नेबारे पनि अनुसन्धान भइरहेको छ ।
सोधपुछपछि पक्राउ परेका संदिग्धलाई गम्भीर हिंसात्मक अपराधका लागि सरकारी वकिलको जिम्मा लगाइने प्रहरीले बताएको छ ।
