इरानी जहाजको उद्धारमा श्रीलङ्काको सक्रियता
कोलम्बो – श्रीलङ्काले आफ्नो समुद्री क्षेत्र नजिकै समस्यामा परेको इरानी जहाजबाट २ सयभन्दा बढी नाविकको उद्धार सुरु गरेको छ। इन्जिन बिग्रिएपछि सहयोगको अपिल गरेको उक्त जहाजका चालक दलका सदस्यहरूलाई मानवीय सहायता स्वरूप उद्धार गरी किनारतर्फ ल्याउन थालिएको हो।
श्रीलङ्काको नौसेनाका अनुसार नाविकहरूलाई सुरुमा कोलम्बो बन्दरगाह ल्याइनेछ। त्यहाँ स्वास्थ्य परीक्षण र कानुनी प्रक्रिया पूरा गरेपछि उनीहरूलाई वेलिसारा नौसैनिक शिविरमा राखिने योजना छ। राष्ट्रपतिले अन्तर्राष्ट्रिय समुद्री कानुनअनुसार नै यो सहायता प्रदान गरिएको स्पष्ट पारेका छन्।
यसअघि बुधबार मात्रै श्रीलङ्काको तट नजिकै अमेरिकी पनडुब्बीले इरानको अर्को युद्धपोत डुबाएको थियो। उक्त घटनामा ३२ जनाको जीवितै उद्धार गरिएको छ भने ८७ जनाको शव फेला परेको छ। इरानले सो आक्रमणको कडा आलोचना गरेको छ। भारतीय महासागरमा बढ्दो सैन्य तनावका बीच श्रीलङ्काले मानवीय आधारमा यो उद्धार कार्य अघि बढाएको बताएको छ।
