ममता काफ्ले बेपत्ता प्रकरण: अदालतमा बच्चा हेर्ने व्यक्तिको बयान र नरेशको भिडियो प्रस्तुत
न्युयोर्क- नरेश भट्ट पत्नी ममता काफ्लेको हत्या मुद्दामा बच्चा हेर्ने व्यक्तिले अदालतमा बयान दिएकी छन्। सन् २०२४ अगस्ट १ मा नरेशले बच्चालाई छोड्दा बच्चालाई नुहाइएको थिएन। बयानका अनुसार बच्चाले अघिल्लो दिनकै दाग लागेको लुगा लगाएकी थिइन् भने कपाल पनि कोरिएको थिएन।
यसअघि नरेश बिना अनुमति ती व्यक्तिको घरभित्र पसेका थिए। बचाउ पक्षका वकिलले यसबारे जिरह गर्दा उनले नरेशलाई घरभित्र नआउन कहिल्यै नभनेको कुरा पुष्टि गरिन्। आफू अचम्ममा परे पनि नरेशलाई घरभित्र नपस्न भनेर मुखले नभनेको उनले स्वीकार गरिन्।
अदालतमा प्रहरीले नरेशसँग गरेको सोधपुछको भिडियो पनि देखाइएको छ। प्रहरीले ममता वैवाहिक जीवनमा खुसी थिइन् कि थिइनन् भनेर सोध्दा नरेशले ‘थिइन्’ भनेर जवाफ दिए। पत्नी किन पटक-पटक घर छोडेर हिँड्थिन् भन्ने प्रश्नमा नरेशले आफूले आमाबुवालाई बढी ध्यान दिएको भन्दै ममताले त्यसमा असन्तुष्टि जनाउने गरेको बताए।
