दशैँमा यात्रुलाई सजिलो बनाउन नेपाल प्रहरीको निःशुल्क बस
दशैँको बेला काठमाडौँ उपत्यकामा गाडी नपाएर दुःख पाउने सर्वसाधारणलाई सजिलो होस् भनेर नेपाल प्रहरीले निःशुल्क बस चलाएको छ। प्रहरीले कात्तिक ३ र ४ गते उपत्यकाका तीनवटा छुट्टाछुट्टै बाटोमा यस्तो सेवा दिएको हो।
प्रहरीका अनुसार पहिलो बस नक्सालबाट निस्केर बालुवाटार, नयाँ बसपार्क, कलंकी, सातदोबाटो हुँदै लगनखेल, थापाथली, पुतलीसडकबाट फेरि नक्साल नै आइपुग्नेछ। त्यसैगरी, दोस्रो बस नक्सालबाट रत्नपार्क, बानेश्वर, कोटेश्वर हुँदै भक्तपुरको सूर्यविनायक पुग्नेछ र त्यहाँबाट चाबहिल, सुकेधारा हुँदै नक्साल फर्किनेछ। तेस्रो बस नक्सालबाट बालाजु, नयाँ बसपार्क, गौशाला, कोटेश्वर, सातदोबाटो, बल्खु, कलंकी हुँदै फेरि नक्साल नै पुग्नेछ।
दशैँको बेला गाडी नपाउँदा यात्रुले भोग्नुपर्ने सास्ती कम गर्न यो बस सेवाले ठूलो मद्दत गर्नेछ। यी बसहरू बिहान ८ बजे पहिलो चरणमा र दिउँसो साढे ३ बजे दोस्रो चरणमा चल्नेछन्।
