भारतको फ्लिपकार्टमा गुगलले गर्यो ३५ करोड डलर लगानी
काठमाडौं । गुगलले भारतको इकमर्स कम्पनी फ्लिपकार्टमा ३५ करोड अमेरिकी डलर लगानी गरेको छ । वालमार्टको स्वामित्वमा रहेको कम्पनीमा लगानी गर्ने गुगल पछिल्लो हाइप्रोफाइल कम्पनी हो ।
बेंगलुरूमा मुख्यालय रहेको स्टार्टअपलाई गुगलले क्लाउड सेवा समेत उपलब्ध गराउने गरी सम्झौता भएको बताइएको छ ।शुक्रबार दुवै कम्पनीले संयुक्त विज्ञप्ति जारी गर्दै यो जानकारी दिएका हुन् ।
फ्लिपकार्टले सन् २०२३ मा एक अर्ब अमेरिकी डलर लगानी जुटाउने गरी पहल चालेको थियो । त्यसपछि वालमार्टले यसमा ६० करोड अमेरिकी डलर लगानी गरेको थियो ।
भारतका विभिन्न सहरमा करोडौँलाई सेवा दिने फ्लिपकार्टको बजार मूल्य ३३ अर्ब अमेरिकी डलर रहेको छ ।
