बाइडेनको अडान कायमै, भने– भगवानले भने मात्रै उमेदवारी छोड्छु
वासिंटन । अमेरिकी राष्ट्रपति जो बाइडेनले भगवानले मात्र आफूलाई दोस्रोपटक राष्ट्रपति पदका लागि आफ्नो उमेदवारी रोक्नका लागि मनाउन सक्ने बताएका छन् । उनकी पत्नीले उनलाई मनाउन सक्ने बारेमा चर्चा भइरहेको बेलामा बाइडेनले शुक्रबार एक टेलिभिजन अन्तर्वार्तामा पछिल्लो धारणा राखेका हुन् ।
बाइडेनले आफ्नो उमेदवारीको सम्बन्धमा डेमोक्रेटिक पार्टीका तर्फबाट व्यक्त गरिएको चिन्ता अन्तर्वार्ताका क्रममा शान्त पार्ने प्रयास गरेका थिए । यद्यपि, उनको अन्तर्वार्तापछि पनि डेमोक्रेटिक नेता तथा कार्यकर्ताले बेलैमा बाइडेनले छोडे अब आउने उमेदवारलाई सजिलो हुने बताएका छन् ।
दोस्रो कार्यकालमा पनि डोनाल्ड ट्रम्पले जिते अमेरिकाका लागि राम्रो नहुने उनीहरूको तर्क रहेको छ । पार्टीको तर्फबाट बाइडेनको विकल्पका रूपमा अहिले धेरैले उपराष्ट्रपति कमला ह्यारिसको पक्षमा समर्थन देखाइरहेका छन् ।तर, बाइडेनले उमेदवारका रूपमा आफू भन्दा अरु कोही उपयुक्त हुने र जित्ने आफूलाई नलागेको बताएका छन् ।
बाइडेनले अन्तर्वार्ताका क्रममा कग्निनिटिभ टेस्ट (संज्ञानात्मक परीक्षण) दिने र यसको नतिजा सार्वजनिक गर्ने कुरा अस्वीकार गरेका थिए । बाइडेनमाथि अर्को कार्यकाल काम गर्न उपयुक्त भएको पुष्टि गर्न समेत माग भइरहेको छ ।
एबीसीको अन्तर्वार्तामा पत्रकार जर्ज स्टीफनोपालसले जब टेस्टको बारेमा सोधेका थिए, बाइडेनको जवाफ थियो, “म हरेक दिन कग्निटिभ टेस्ट दिइरहेको छु । हरेक चिज जुन म गरिरहेको छु, त्यो टेस्ट हो ।”
८१ वर्षीय बाइडेनलाई डेमोक्रेटिक पार्टीका नेता कार्यकर्ता मात्र होइन पार्टीका डोनर्सले समेत राष्ट्रपति पदको उमेदवारी छोड्नुपर्ने बताउँदै आएका छन् । बीबीसी
