हश मनि मुद्दामा ट्रम्पलाई अदालतले दियो बिना शर्त रिहा
न्यूयोर्क : पूर्व अमेरिकी राष्ट्रपति डोनाल्ड ट्रम्प अमेरिकी इतिहासमा दोषी ठहरिने पहिलो राष्ट्रपति बनेका छन्। उनलाई शुक्रबार, एक पोर्न स्टारलाई चुप बस्न पैसा तिरेको मुद्दासँग सम्बन्धित ३४ आरोपमा सजाय सुनाइएको हो।
हाल न्यूयोर्कको म्यानहट्टन अदालतले ट्रम्पलाई जेल नपठाएर कुनै पनि शर्त बिना नै मुक्त गरेको छ।
ट्रम्प भिडियो कन्फरेन्सिङ मार्फत अदालतमा उपस्थित भएका थिए। अदालतमा चारवटा ठूला स्क्रिनहरू जडान गरिएका थिए र सजाय सुनाइँदा ट्रम्प त्यसमा देखिएका थिए। फैसला सुनाउँदै न्यायाधीश जुआन मर्चनले भनेका थिए, ‘म तपाईंको दोस्रो कार्यकालको सफलताको कामना गर्दछु।’
ट्रम्पलाई दिइएको सजाय केवल प्रतीकात्मक भएको जनाइएको छ। यसको अर्थ न त उनी जेल जानेछन् न त जरिवाना नै तिर्नु पर्नेछ। यद्यपि, उनले अमेरिकी राष्ट्रपतिको रूपमा दोषी ठहरिएको अपराधीको रूपमा शपथ लिनेछन्, जसले उनको छविलाई हानि पुर्याउनेछ।
न्यायाधीश मार्चनले भने, ‘यस देशको सर्वोच्च पद (राष्ट्रपति) को शक्तिमा हस्तक्षेप नगरी ट्रम्पलाई बिना शर्त रिहा गर्नु नै सही सजाय हुनेछ।’ यो सुनेपछि ट्रम्प चुप लागेका थिए र उनको स्क्रिन अचानक बन्द भयो।
ट्रम्पलाई उनको शपथग्रहणको १० दिन अघि मात्र सजाय सुनाइएको थियो। यो सजाय उनलाई गत वर्ष जुलाईमा नै सुनाइने थियो, जसको परिणाम उनले चुनावमा समयमा भोग्नु पर्ने थियो। यसकारण उनले बारम्बार सजाय स्थगित गरिरहे।
ट्रम्पले नोभेम्बर ६ मा अमेरिकी राष्ट्रपति चुनाव जितेका थिए र उनले जनवरी २० मा शपथ लिने कार्यक्रम छ। ट्रम्पले सजायबाट बच्न सर्वोच्च अदालतमा अपील गरे। तर, बिहीबार अदालतले उनको निवेदन खारेज गरिदियो।
