न्यूयोर्कको मिड-स्टेट सुधारगृहमा कैदीको मृत्युबारे छानबिन सुरू
न्यूयोर्क – न्यूयोर्क राज्य प्रहरीले शनिबार अपस्टेट न्यूयोर्कको मिड-स्टेट सुधारगृहमा रहेका २२ वर्षीय कैदी मसीहाह नान्ट्वीको मृत्युबारे छानबिन गरिरहेको जनाएको छ। न्यूयोर्कका गभर्नर केथी होचुलले सोमबार यस घटनालाई “गहिरो रूपमा चिन्ताजनक” भन्दै अनुसन्धान जारी रहेको बताइन्।
राज्य प्रहरीले सोमबार नान्ट्वीको मृत्यु अस्पतालमा भएको पुष्टि गरे पनि उनको मृत्युको कारणबारे कुनै औपचारिक विवरण सार्वजनिक गरिएको छैन। तर, New York Times को रिपोर्ट अनुसार, नौजना कैदीहरूले दिएको बयानमा सुधारगृहका सुरक्षाकर्मीहरूले उनलाई निर्ममतापूर्वक कुटपिट गरेको बताएका छन्।
घटनापछि सुधारगृहका ११ जना कर्मचारीलाई प्रशासनिक बिदामा पठाइएको छ। न्यूयोर्क राज्य सुधार तथा पुनःस्थापना विभागका आयुक्त डेनियल मार्टुसेलो तृतीयले घटनालाई “दुर्भाग्यपूर्ण” भन्दै छानबिनका लागि न्यूयोर्क राज्य प्रहरी र महान्यायाधिवक्ताको कार्यालयलाई खवर गरिएको बताए।
नान्ट्वीको मृत्यु माघमा मार्सी सुधारगृहमा भएको अर्को कैदी रोबर्ट ब्रुक्सको मृत्युपछि भएको हो। सुधारगृहका सुरक्षाकर्मीहरूले गरेको कुटपिटपछि ४३ वर्षीय ब्रुक्सको मृत्यु भएको अधिकारीहरूले बताएका थिए। उक्त घटनामा संलग्न ६ सुरक्षाकर्मीहरूलाई हत्याको अभियोग लगाइएको थियो।
नान्ट्वी मिड-स्टेट सुधारगृहमा आपराधिक हतियार राख्ने मुद्दामा पाँच वर्षको सजाय भोगिरहेका थिए। साथै, उनलाई सन् २०२३ को अप्रिलमा म्यानहट्टनको हार्लेम क्षेत्रमा दुई व्यक्तिको हत्या गरेको आरोप लागेको थियो। उनले ती आरोप अस्वीकार गर्दै निर्दोष दाबी गरेका थिए।
न्यायिक सहायता समाज लगायत कानुनी संस्थाहरूले सुधारगृहमा भएका घटनाहरूको पारदर्शी छानबिन गर्न माग गरेका छन्। सो संस्थाले सुधारगृहभित्रका सबै सुरक्षा क्यामेराका फुटेज र घटनासम्बन्धी सम्पूर्ण जानकारी सार्वजनिक गर्न माग गर्दै भनेको छ, “यो घटनाले न्यूयोर्कका सुधारगृहहरूमा कर्मचारीद्वारा हुने हिंसात्मक व्यवहारको गहिरो जरो गाडिएको संस्कृति उजागर गर्छ।”
यसैगरी, न्यूयोर्क काउन्टी डिफेन्डर सर्भिसेजका कार्यकारी निर्देशक स्टान जर्मानले नान्ट्वीलाई “राज्य सुधार विभागको पछिल्लो पीडित” भन्दै उनको मृत्यु सुधारगृहका कर्मचारीहरूकै आक्रमणका कारण भएको दाबी गरे।
राज्य सुधार विभाग र राज्य प्रहरीले छानबिन गरिरहेको भए पनि नान्ट्वीको मृत्युमा संलग्न व्यक्तिहरूविरुद्ध कुनै औपचारिक कारबाही भएको छैन। घटनासँग सम्बन्धित थप विवरण आउन बाँकी छ।
