आईसीई शिकागोद्वारा भिसा ठगीमा दोषी ठहर भएका सिएरा लियोनका नागरिकलाई देश निकाला

न्युयोर्क– अमेरिकी अध्यागमन तथा भन्सार प्रवर्तनले ६२ वर्षीय सिएरा लियोनका नागरिक प्रिन्स सोलोमन नक्सलाई मार्च १ मा उनको मातृभूमि फिर्ता पठाएको छ। नक्सलाई फेब्रुअरी ४ मा सेंट लुइसमा आईसीईले पक्राउ गरेको थियो। उनी भिसा ठगी तथा घरेलु हिंसाका घटनामा दोषी ठहर भएका थिए। उनले आतंकवादी सशस्त्र समूहहरूसँगको आफ्नो संलग्नताबारे झूठाे विवरण दिएको पुष्टि भएको थियो।

नक्स अप्रिल १४, २००४ मा शिकागो ओ’हेयर अन्तर्राष्ट्रिय विमानस्थल हुँदै अमेरिका प्रवेश गरेका थिए। सन् २००६ मा, शरणार्थी पुनर्स्थापना कार्यक्रममा अपात्र लडाकु वा नक्कली शरणार्थीहरूले ठगी गरेको विषयमा अनुसन्धान गर्ने क्रममा उनी आईसीईको निगरानीमा परेका थिए। अनुसन्धानको क्रममा प्रत्यक्षदर्शीहरूले पश्चिम अफ्रिकाका विभिन्न लडाकु समूहहरूसँग उनको संलग्नताको बारेमा साक्षी दिएका थिए। तिनै समूहहरूमध्ये ‘रिभोल्युशनरी युनाइटेड फ्रन्ट’नामक समूहले बाल सैनिकहरूको व्यापक प्रयोग गर्नुका साथै हजारौं सिएरा लियोनवासीहरूको हात, खुट्टा र अन्य अंगहरूमा खुकुरीजस्तै हतियार प्रयोग गरी काट्ने जस्ता नरसंहार गरेका थिए।

यस अनुसन्धानकै आधारमा अमेरिकी संघीय ग्रान्ड जुरीले नक्सविरुद्ध दुईवटा भिसा ठगी र दुईवटा झूटो बयान दिने अभियोग लगाउँदै अभियोग दायर गरेको थियो। आईसीईले उनलाई डिसेम्बर २१, २००६ मा पक्राउ गरेको थियो। त्यसपछि, जुन २०, २००७ मा इलिनोइसको उत्तरी जिल्ला अदालतले उनलाई दोषी ठहर गर्दै १२ महिनाको जेल सजायँ सुनाएको थियो।

जेलमा रहँदै, जुन ६, २००८ मा अध्यागमन न्यायाधीशले उनलाई अमेरिका निकाला गर्ने आदेश दिएका थिए। त्यसपछि, उनी हटाउने प्रक्रियाको क्रममा निगरानीमा राखिएका थिए। अन्ततः आईसीईले मार्च १ मा उनलाई सिएरा लियोन फिर्ता पठाएको हो।