सिरियामा हिंसा बढ्दै जाँदा सयौं नागरिकको हत्या

न्युयोर्क- पश्चिमी सिरियामा भयानक भिडन्तका कारण सयौं नागरिकको हत्या भएको भन्दै अन्तर्राष्ट्रिय स्तरमा चिन्ता व्यक्त गरिएको छ। पूर्व राष्ट्रपति बशर अल-असदको शासनप्रति वफादार लडाकुहरू र नयाँ सरकारबीच तीव्र संघर्ष भइरहेका छन्। नयाँ सरकारका पक्षधर सेनाहरूद्वारा बदला स्वरूप गरिएको नरसंहारमा ठूलो संख्यामा सर्वसाधारणको हत्या गरिएको आरोप लागेको छ।

शनिबार बेलायतस्थित युद्ध अनुगमन गर्ने संस्था, सिरियन अब्जरभेटरी फर ह्युमन राइट्सका अनुसार पछिल्ला दुई दिनमा १,०१८ जनाको मृत्यु भएको छ। तीमध्ये ७४५ जना सर्वसाधारण रहेको बताइएको छ, जसलाई नयाँ सरकार समर्थक लडाकुहरूले “जातीय नरसंहार” गर्दै हत्या गरेको आरोप लगाइएको छ।

तीन महिनाअघि असद सत्ताच्युत भएयता यो सबैभन्दा भीषण हिंसा भएको बताइएको छ। संघर्ष सिरियाको पश्चिमी तटीय क्षेत्रमा केन्द्रित छ, विशेष गरी लताकिया र टार्टुस वरपरका असद समर्थकहरूको गढमा। बिहीबार त्यहाँ असद समर्थक लडाकुहरूले नयाँ सरकारका सुरक्षाकर्मीमाथि घातक आक्रमण गरेका थिए।

त्यसपछि, नयाँ सरकारका सुरक्षा बलहरू तथा हजारौं सशस्त्र समर्थकहरू उक्त क्षेत्रमा प्रवेश गरी असद समर्थकहरूसँग भीषण भिडन्तमा संलग्न भएका छन्।

उक्त तटीय क्षेत्र अलावाइट समुदायको बसोबास क्षेत्र हो, जसका सदस्य पूर्व राष्ट्रपति असदसँग सम्बन्धित थिए। रिपोर्ट अनुसार, अहिले अलावाइट समुदायलाई लक्षित गरी व्यापक नरसंहार गरिएको छ।

एसोसिएटेड प्रेसले केही स्थानीय बासिन्दासँग कुरा गरेको छ। ती बासिन्दाका अनुसार बन्दुकधारीहरूले सडकमा अलावाइट पुरुषहरूको हत्या गरेका थिए। उनीहरूले केही घरहरू लुटपाट गरी आगो लगाएको बताएका छन्।

सर्वसाधारणका साथै, युद्ध अनुगमन समूहका अनुसार १२५ जना सरकारी सुरक्षा अधिकारीहरू र असद समर्थक लडाकु समूहका १४८ सदस्यहरूको पनि मृत्यु भएको छ।

यसैबीच, प्रभावित क्षेत्रहरूमा दोस्रो दिनसम्म बिजुली र खानेपानी आपूर्ति ठप्प भएको छ। सुरक्षा अवस्था बिग्रँदै गएकाले स्थानीय बजारहरू र बेकरीहरू पनि बन्द गरिएका छन्।

सिरियाका अन्तरिम नेता अहमद अल-शरा ले शुक्रबार राष्ट्रलाई सम्बोधन गर्दै यस हिंसाको दोष पुरानो सरकार समर्थकहरूलाई दिए। उनले नयाँ सिरियालाई अस्थिर पार्ने षड्यन्त्रस्वरूप उनीहरूले हिंसा मच्चाएको बताए। शान्ति कायम गर्न आह्वान गर्दै उनले सुरक्षा बलहरूलाई अत्यधिक बल प्रयोग नगर्न निर्देशन दिएका छन्।

बेलायतकी सिरियासम्बन्धी प्रतिनिधि एन स्नोले संयमता अपनाउन आग्रह गर्दै भनिन्, “यी घटनाक्रमहरू निकै चिन्ताजनक छन्। संयमता आवश्यक छ, साथै सिरियाली जनताले चाहेको समावेशी राजनीतिक रूपान्तरणका लागि स्पष्ट न्यायिक प्रक्रिया सुनिश्चित गरिनुपर्छ।”