आईसीईद्वारा कोलम्बिया विश्वविद्यालयमा इजरायल विरोधी प्रदर्शनमा संलग्न रहेका प्यालेस्टिनी कार्यकर्ता पक्राउ
न्युयोर्क- संयुक्त राज्य अमेरिकाको आप्रवासन तथा भन्सार प्रवर्तन (आईसीई) निकायले कोलम्बिया विश्वविद्यालयमा इजरायलविरुद्धको प्रदर्शनको नेतृत्व गरेका एक प्यालेस्टिनी विद्यार्थीलाई पक्राउ गरेको छ।
मह्मुद खलिललाई शनिबार राति न्यूयोर्कस्थित कोलम्बिया विश्वविद्यालयको स्वामित्वमा रहेको निवासभित्रैबाट आईसीई अधिकारीहरूले नियन्त्रणमा लिएको उनको कानूनी प्रतिनिधि एमी ग्रियरले जानकारी दिएकी छन्।
ग्रियरका अनुसार पक्राउको क्रममा उनले एक आईसीई अधिकारीसँग कुराकानी गर्दा, अधिकारीले विदेश मन्त्रालयको निर्देशनअनुसार खलिलको विद्यार्थी भिसा रद्द गरिएको बताएका थिए। तर, खलिल स्थायी अमेरिकी आवासीय अनुमति (ग्रीन कार्ड) लिई अमेरिका बसेको जानकारी दिँदा पनि अधिकारीहरूले उनको ग्रीन कार्डसमेत खारेज गरिएको बताएका थिए।
यो गिरफ्तारी अमेरिकी राष्ट्रपति डोनाल्ड ट्रम्प प्रशासनद्वारा गरिएको पहिलो ठूलाे कदमहरूमध्ये एक हुनसक्ने अनुमान गरिएको छ। ट्रम्प प्रशासनले गाजा युद्धविरुद्ध क्याम्पसहरूमा भएका प्रदर्शनमा सहभागी अन्तर्राष्ट्रिय विद्यार्थीहरूलाई देशनिकाला गरिने चेतावनी दिएको थियो। प्रशासनले ती प्रदर्शनकारीहरूलाई हमास नामक आतङ्ककारी समूहलाई समर्थन गरेको आरोप लगाउँदै अमेरिका बस्ने अधिकार गुमाएको बताएको छ।
आईसीई अधिकारीहरू खलिललाई गिरफ्तार गर्न पुग्दा उनकी आठ महिनाकी गर्भवती अमेरिकी नागरिक पत्नीलाई पनि पक्राउ गर्ने धम्की दिएको ग्रियरले बताएकी छन्। यद्यपि, उनीहरूले खलिललाई पक्राउ गर्नुको कारण खुलाएका थिएनन्।
शुरूमा खलिललाई न्युजर्सीको एलिजाबेथस्थित आप्रवासन हिरासत केन्द्रमा राखिएको जानकारी प्राप्त भएको थियो। तर, जब उनकी पत्नी आइतबार उनलाई भेट्न गइन्, उनले खलिल त्यहाँ नभएको र उनलाई लुइसियानासम्म स्थानान्तरण गरिएको हुनसक्ने जानकारी पाइन्।
“हामीलाई उनी किन पक्राउ परेका हुन् भन्ने कुनै स्पष्ट जानकारी दिइएको छैन,” वकिल ग्रियरले भनिन्। “यो प्रशासनको धम्कीलाई कार्यान्वयन गर्ने एउटा गम्भीर संकेत हो।”
