ह्युस्टन क्षेत्रमा आईसीईद्वारा ५४३ आपराधिक आप्रवासी र ७ गिरोह सदस्य पक्राउ

न्युयोर्क — अमेरिकी अध्यागमन तथा भन्सार प्रवर्तन (ICE) ले संघीय, राज्य र स्थानीय कानूनी निकायहरूसँगको सहकार्यमा फेब्रुअरी २३ देखि मार्च २ सम्म ह्युस्टन क्षेत्रमा एक सातासम्म चलेको विशेष अपरेशनको क्रममा ६४६ अवैध आप्रवासीहरूलाई पक्राउ गरेको छ। पक्राउ परेकामध्ये ५४३ जना आपराधिक आप्रवासी तथा ७ जना गिरोहका सदस्य रहेका छन्। यो अपरेशन सार्वजनिक सुरक्षा, राष्ट्रिय सुरक्षा, तथा सीमा सुरक्षालाई मजबुत बनाउन केन्द्रित थियो।

अपरेशनका क्रममा आईसीई तथा यसको सहकार्य निकायहरूले ७१ आपराधिक पक्राउ पुर्जी कार्यान्वयन गरेका थिए। साथै, अवैध रूपमा अमेरिका रहेका तथा आपराधिक अभियोग लागेका वा सजाय भोगिसकेका ५४३ आप्रवासीलाई पक्राउ गरिएको छ। तिनीहरू निम्न अपराधहरूमा संलग्न रहेका थिएः

– १४० जना गम्भीर अपराधमा संलग्न, जस्तै हत्या, गम्भीर आक्रमण वा घरेलु हिंसा।
– ३४ जना यौन अपराध वा बाल यौन शोषण जस्तै नाबालकमाथि यौन आक्रमण, बाल पोर्नोग्राफी राख्ने वा बलात्कारको अभियोगमा।
– ३८ जना अवैध रूपमा हातहतियार राख्ने वा प्रयोग गर्ने, जस्तै गैरकानुनी रूपमा बन्दुक बोक्ने वा हतियार आक्रमणको अभियोगमा।
– ५२ जना लागुऔषध अपराधमा संलग्न, जस्तै लागू पदार्थ ओसारपसार वा नियन्त्रण गरिएको पदार्थ राख्ने।
– ५१ जना सम्पत्ति सम्बन्धी अपराध, जस्तै डकैती वा चोरीमा संलग्न।
– ९३ जना मादक पदार्थ सेवन गरी सवारी चलाएको अभियोगमा।

आईसीई होमल्याण्ड सेक्युरिटी अनुसन्धान (HSI) ह्युस्टनका विशेष एजेन्ट प्रमुख चाड प्लान्ट्जका अनुसार, “संघीय, राज्य तथा स्थानीय निकायहरूसँग मिलेर हामीले मानव तस्कर, गिरोह सदस्य, मानव तस्करीमा संलग्न अपराधी, बाल यौन अपराधी, लागुऔषध कारोबारी तथा हतियार तस्करहरूलाई पक्राउ गर्न सफल भयौं। यस अपरेशनले स्थानीय समुदायलाई अझ सुरक्षित बनाउनुका साथै राष्ट्रिय सुरक्षा र सीमा सुरक्षालाई पनि मजबुत बनाएको छ।”

यस अपरेशनमा यूएस कस्टम्स एण्ड बोर्डर प्रोटेक्शन, मदिरा, सुर्ती, हतियार तथा विस्फोटक ब्यूरो, एफबीआई, लागूऔषध प्रवर्तन प्रशासन (DEA), टेक्सास सार्वजनिक सुरक्षा विभाग, कूटनीतिक सुरक्षा सेवा, यूएस मार्शल सेवा लगायतका संघीय, राज्य र स्थानीय सुरक्षा निकायहरूले सहभागिता जनाएका थिए।