लङ आइल्याण्डमा लागेको भीषण डढेलोको कारण ‘स्मोर्स’ बनाउने प्रयास: अनुसन्धानकर्ताहरू
न्युयोर्क- लङ आइल्याण्डमा शनिबार लागेको भीषण डढेलोको कारण पत्ता लगाउन खटिएका अनुसन्धानकर्ताहरूले यसको सुरुवात एक घरको पछाडिको आँगनमा भएको निष्कर्ष निकालेका छन्।
सोमबार अधिकारीहरूले बताएका अनुसार, म्यानोरभिलस्थित एन कोजिन रोड मा शनिबार बिहान केही मानिसहरूले ‘स्मोर्स’ बनाउन खोज्दा आगो सल्किएको थियो। आगो बाल्न उनीहरूले गत्ता प्रयोग गरेका थिए, जसले अनियन्त्रित रुपमा झाडीमा डढेलो फैलिएको सफोक प्रहरी आयुक्त केभिन क्याटालिनाले जानकारी दिए।
शनिबारको तीव्र हावाहुरीले आगोको झिल्का पूर्वतर्फ इस्ट मोरिचेस, इस्टपोर्ट हुँदै वेस्टह्याम्पटन सम्म फैलिएको थियो। सोही क्षेत्रमा सबैभन्दा ठूलो डढेलो फैलिएको थियो। सफोक काउन्टी कार्यकारी प्रमुख एड रोमेइन का अनुसार, ढलेका रुखहरू तथा ३५ माइल प्रतिघण्टा वेगको हावाले आगलागी अझ तीव्र बनाएको थियो।
वेस्टह्याम्पटन पाइन्स डढेलो ले ६०० एकडभन्दा बढी क्षेत्रफल जलाएको थियो। अग्नि नियन्त्रकहरूले निरन्तर प्रयास गरेपछि २४ घण्टाभित्र डढेलोको अधिकांश भाग नियन्त्रणमा आएको थियो।
न्यूयोर्क राज्यका गभर्नरले लङ आइल्याण्ड तथा हडसन भ्यालीका केही भागहरूमा अस्थायी आगो प्रतिबन्ध (Burn Ban) लगाउने घोषणा गरेकी छन्। यस अन्तर्गत बाहिरी क्याम्पिङ, खाना पकाउने, तथा न्यानो राख्नका लागि गरिने आगो बाल्न प्रतिबन्ध लगाइएको छ। तर, सुरक्षित रूपमा राखिएको फायरपिट, सानो क्याम्पफायर तथा सीमित खाना पकाउने आगोलाई भने अनुमति दिइएको छ।
यो प्रतिबन्ध मार्च १६ देखि लागू हुने वार्षिक राज्यव्यापी आगो प्रतिबन्ध सुरु नहुन्जेल कायम रहनेछ।
रोमेइन ले रातभर आगो निभाउन खटिएका अग्निनियन्त्रकहरूप्रति आभार व्यक्त गर्दै ८० भन्दा बढी स्वयंसेवी दमकल विभागहरूले आगो निभाउने प्रयासमा संलग्न भएको बताए। आगलागीमा परी दुई जना अग्निनियन्त्रक घाइते भई अस्पताल भर्ना भएका थिए तर उपचारपछि उनीहरूलाई डिस्चार्ज गरिएको छ।
