ट्रम्पद्वारा क्यानाडाली स्टिल र एल्युमिनियममा शुल्क दोब्बर, विद्युतीय करको जवाफमा कठोर कदम
वासिङ्टन – अमेरिकी राष्ट्रपति डोनाल्ड ट्रम्पले मंगलबार घोषणा गर्दै क्यानाडाबाट आयात गरिने स्टिल र एल्युमिनियममा लगाइएको कर दोब्बर पार्ने बताएका छन्। यसअघि २५ प्रतिशत रहेको यो कर बुधबारदेखि ५० प्रतिशत पुर्याइनेछ।
यो निर्णय ओन्टारियो प्रान्तले अमेरिका पठाइने विद्युत्मा २५ प्रतिशत कर लगाएको प्रतिक्रियास्वरूप आएको हो। ट्रम्पले आफ्नो ट्रुथ सोसल प्लेटफर्ममार्फत् पोस्ट गर्दै भने, “ओन्टारियोले लक्षित गरेका तीनवटा अमेरिकी राज्यहरूमा म ‘राष्ट्रिय आपतकाल’ घोषणा गर्दैछु ताकि यी करहरू तुरुन्तै लागू गर्न सकूँ।”
यसका साथै ट्रम्पले क्यानाडालाई अमेरिकी दुग्धजन्य उत्पादनमा लगाइएका कर हटाउन आग्रह गरे। यदि क्यानाडाले अन्य “अन्यायपूर्ण र लामो समयदेखि कायम रहेका करहरू” हटाएन भने अमेरिकाले क्यानाडाबाट आयात गरिने गाडीहरूमा “ठूलो मात्रामा” थप कर लगाउने चेतावनी पनि दिए।
ट्रम्पले हालै क्यानाडालाई अमेरिकामा समावेश गर्ने आफ्नो विचार पुनः दोहोर्याउँदै भने, “एक मात्र तार्किक कुरा भनेको क्यानाडा हाम्रो प्रिय एकाउन्नौं राज्य बन्नु हो। यसो गर्दा सबै करहरू मात्र होइन, अन्य सबै समस्या पनि स्वतः समाधान हुनेछन्।”
ट्रम्पको दोस्रो राष्ट्रपतिकालको पहिलो केही महिनामा नै अमेरिका-क्यानाडाबीचको सम्बन्ध तनावग्रस्त बनेको छ। पहिले नजिक रहेका यी दुई छिमेकी राष्ट्रहरूबीचको व्यापारिक सम्बन्धमा खटपट देखिएको छ। ट्रम्पले विभिन्न क्यानाडाली वस्तुहरूमा कर लगाउने र फिर्ता लिने निर्णयहरू गर्दै आएका छन्। साथै, उनले सार्वजनिक रूपमा क्यानाडाली नेताहरूलाई उक्साउँदै तस्करी तथा व्यापार मुद्दामा दोषारोपण पनि गरेका छन्।
मेक्सिकोले पनि यस्तै व्यापारिक धम्की र शुल्क वृद्धिको सामना गरेको छ। तर, मेक्सिकोकी राष्ट्रपति क्लाउडिया शेनबाउमले ट्रम्पलाई सम्झाएर द्विपक्षीय सम्बन्ध सहज बनाएको देखिन्छ। यता, क्यानाडाले भने प्रतिकार गर्दै थप कर लगाउने तथा सार्वजनिक रूपमा प्रतिक्रिया दिने नीति अपनाएको छ।
