डेनभर विमानस्थलमा अमेरिकन एयरलाइन्सको विमानको इन्जिनमा आगलागी
डेनभर— अमेरिकन एयरलाइन्सको एक विमानको इन्जिन अवतरणपछि आगो लागेको छ। घटना बिहीबार साँझ डेनभर अन्तर्राष्ट्रिय विमानस्थलमा भएको अधिकारीहरूले जनाएका छन्।
अमेरिकन एयरलाइन्स फ्लाइट १००६ कोलोराडो स्प्रिङ्सबाट डल्लास फोर्ट वर्थ अन्तर्राष्ट्रिय विमानस्थल जाँदै थियो। तर, उडानका क्रममा इन्जिनमा समस्या देखिएपछि विमानलाई डेनभरतर्फ डाइभर्ट गरिएको थियो।
बोइङ ७३७-८०० मोडेलको विमान स्थानीय समयअनुसार बेलुका ५:१५ मा सुरक्षित रूपमा अवतरण गर्यो। अवतरणपछि गेटतर्फ लैजाँदा इन्जिनमा आगलागी भयो। तत्कालै आपत्कालीन प्रस्थान स्लाइडको प्रयोग गरी यात्रुहरूलाई उद्धार गरिएको थियो।
विमानमा १७२ यात्रु र ६ जना चालक दलका सदस्य थिए। कुनै घाइते भएको खबर छैन।
सामाजिक सञ्जालमा भाइरल भएका भिडियोहरूमा विमानबाट मुस्लो धुवाँ निस्किएको देखिन्छ भने केही यात्रुहरू पखेटामा उत्रिएका छन्। अर्को दृश्यमा चालक दलका सदस्यहरू आगो निभाउने प्रयास गरिरहेका देखिन्छन्।
अमेरिकन एयरलाइन्सले यसलाई ‘इन्जिनसम्बन्धी समस्या’ भनेको छ, तर विस्तृत विवरण दिएको छैन। एयरलाइन्सले चालक दलका सदस्य, डेनभर विमानस्थल टिम र उद्धारकर्मीहरूप्रति आभार प्रकट गरेको छ।
संघीय उड्डयन प्रशासन (FAA) ले घटनाको अनुसन्धान गर्नेछ।
