हुथी समूहको अमेरिकी हवाई आक्रमणपछि बदला लिने चेतावनी, कम्तीमा ३१ जनाको मृत्यु
वासिङटन- शनिबार अमेरिकाले यमनका हुथी नियन्त्रित क्षेत्रमा गरेको हवाई आक्रमणमा कम्तीमा ३१ जनाको मृत्यु भएको छ भने १०१ जना घाइते भएका छन्। हुथी स्वास्थ्य मन्त्रालयका अनुसार मृत्यु हुनेमध्ये अधिकांश महिला र बालबालिका रहेका छन्।
राष्ट्रपति डोनाल्ड ट्रम्पले शनिबार हुथी नियन्त्रित क्षेत्रमा हवाई आक्रमण गर्ने आदेश दिएको र यो आक्रमण हुथी विद्रोही समूहले महत्त्वपूर्ण समुद्री मार्गमा गरिरहेको आक्रमण रोकिएसम्म जारी रहने चेतावनी दिएका छन्।
हुथी समूहले गाजा युद्धको प्रतिक्रिया स्वरूप क्षेप्यास्त्र र ड्रोन आक्रमण गर्दै आएको थियो, जसले अन्तर्राष्ट्रिय व्यापारीक जहाजहरूलाई असर पुर्याइरहेको थियो। शनिबार साँझ यमनको राजधानी सानासहित सादा, होडैदा, बैदा र मारिबमा शक्तिशाली विस्फोटहरू भएको बताइएको छ।
यमनी टेलिभिजन र एसोसिएटेड प्रेसले सार्वजनिक गरेका फुटेजहरूमा आक्रमणपछिको ठूलो विनाश देख्न सकिन्छ, जसमा उद्धारकर्ताहरू भग्नावशेषमा जीवित व्यक्तिहरू खोज्दै थिए। तस्वीरहरूमा सानाको विमानस्थल परिसरमा कालो धुवाँ उडिरहेको देखिन्छ।
यो आक्रमण हुथी समूहले इजरायली जहाजहरूलाई लक्षित गर्दै आक्रमण पुनः सुरु गर्ने धम्की दिएको केही दिनपछि भएको हो।
हुथी प्रवक्ता नसर अल-दिन आमेरले NBC News सँगको कुराकानीमा हवाई आक्रमणमा मारिनेहरूको धेरैजसो महिला र बालबालिका रहेको दाबी गरेका छन्। उनले भने, “हाम्रो अभियान तबसम्म जारी रहनेछ, जबसम्म गाजाको नाकाबन्दी हटाइँदैन।”
राष्ट्रपति ट्रम्पले इरानलाई हुथी समूहलाई समर्थन गर्न रोक्न चेतावनी दिएका छन् र यदि समर्थन जारी रहेमा त्यसको पूर्ण जिम्मेवारी इरानले लिनुपर्ने बताएका छन्।
इरानी क्रान्तिकारी गार्ड कोरका कमान्डर होसेन सलामीले इरानलाई धम्की दिने जो कोहीलाई “निर्णायक र विनाशकारी” जवाफ दिने बताए। तर उनले हुथी समूह स्वतन्त्र रूपमा निर्णय लिने समूह भएको भन्दै इरानको प्रत्यक्ष संलग्नता नरहेको संकेत गरेका छन्।
रातो समुद्री मार्ग भएर वार्षिक १ ट्रिलियन अमेरिकी डलर बराबरको सामान ओसारपसार हुने गर्छ।
हुथी समूहले इस्राइल-हमास युद्ध सुरु भएदेखि जनवरीको युद्धविरामसम्म १०० भन्दा बढी व्यापारी जहाजहरूलाई लक्षित गरी आक्रमण गरेको छ। यस क्रममा दुई जहाज डुबेको र चार जना नाविक मारिएको बताइएको छ।
यसरी आक्रमण बढ्दै गएपछि केही अन्तर्राष्ट्रिय शिपिङ कम्पनीहरूले आफ्नो सेवा स्थगित गरेका छन्।
यसैबीच, अमेरिकी विदेशमन्त्री मार्को रुबियोले यस महिनाको सुरुवातमा हुथी समूहलाई पुनः ‘विदेशी आतंकवादी संगठन’ को रूपमा सूचीबद्ध गरेका छन्। यसअघि जो बाइडेन प्रशासनले मानवीय सहायता आपूर्तिमा असर पर्नसक्ने भन्दै उक्त सूचीबाट हटाएको थियो।
