इजरायलद्वारा गाजामा घातक हवाई आक्रमण, युद्धविराम भंग
न्युयोर्क- इजरायली सेनाले जनवरी १९ बाट जारी युद्धविरामको अवधिमा पनि गाजामा आफ्ना सैन्य गतिविधिहरू जारी राखेको थियो। तर, मंगलबारका हवाई आक्रमणहरूले युद्धविराम लम्ब्याउने प्रयास पूर्ण रूपमा असफल भएको संकेत दिएका छन्। यो युद्धविराम दुई महिना नपुग्दै भंग भएको हो।
युद्धविराम भंग भएपछि गाजावासीको जीवन झनै कठिन बन्ने देखिएको छ। गाजा क्षेत्रमा अहिले नै अत्यावश्यक सामग्रीहरूको चरम अभाव रहेको छ।
इजरायलले पछिल्ला दुई हप्तादेखि गाजामा खाद्यान्न तथा अन्य मानवीय सहायता आपूर्ति रोक्दै आएको छ। यसको उद्देश्य हमासमाथि दबाब सिर्जना गर्नु, बाँकी बन्धकहरू फिर्ता गराउने प्रयास गर्नु र युद्धविराम लम्ब्याउने नयाँ शर्तहरू लगाउनु रहेको बताइएको छ।
यसै क्रममा इजरायलले गाजामा सञ्चालित अन्तिम विद्युत् सुविधा पनि बन्द गरिदिएको छ, जसले यहाँको पानी संकटलाई झनै गहिरो बनाइदिएको छ। पानी निस्कासन (desalination) प्रक्रिया पनि ठप्प भएको छ।
युद्धविराम अवधिमा गाजामा खाद्य, सरसफाइ सामग्री र अन्य आवश्यक वस्तुहरू बोकेका हजारौं ट्रकहरू प्रवेश गरेपछि केही हदसम्म मानवीय संकट कम भएको थियो।
यदि पछिल्ला हवाई आक्रमणहरूकै कारण युद्ध फेरि चर्कियो भने, १७ महिनादेखि जारी यो द्वन्द्व अझ भयावह बन्ने संयुक्त राष्ट्रसंघका महासचिव एन्टोनियो गुटेरेसले गत महिनामा चेतावनी दिएका थिए।
गत अक्टोबर ७, २०२३ मा हमासद्वारा गरिएको हमलामा २५१ जना इजरायलीहरू अपहरणमा परेका थिए। हालसम्म करिब ६० जना गाजामा बन्धक रहेको विश्वास गरिन्छ, जसमा आधाभन्दा कम मात्र जीवित रहेको अनुमान गरिएको छ।
मंगलबार, हमासका नेता एज्जत अल-रिश्कले इजरायली हवाई आक्रमणहरूलाई गाजामा रहेका बाँकी इजरायली बन्धकहरूका लागि “मृत्युदण्ड” को संज्ञा दिएका छन्।
अक्टोबर ७, २०२३ पछि गाजामा ४८,५०० भन्दा बढी मानिस मारिएका छन् भने ११२,००० भन्दा बढी घाइते भएका छन्।
