अमेरिकामा १४८औं लखन थापा स्मृति दिवस भव्य रूपमा सम्पन्न
न्यूयोर्क- आदिवासी जनजाति महासंघ अमेरिका (फिप्ना)को आयोजनामा नेपालका प्रथम शहीद लखन थापाको १४८औं स्मृति दिवस अमेरिकामा भव्य रूपमा मनाइएको छ। नेपाल सरकारका महिला, बालबालिका तथा जेष्ठ नागरिकमन्त्री नबल किशोर शाह सुडीको प्रमुख आतिथ्यमा सम्पन्न कार्यक्रममा प्रतिनिधिसभाका सदस्य सुशीला श्रेष्ठ र संविधानसभा सदस्यसमेत रहेकी कमला विक विशेष अतिथिका रूपमा उपस्थित थिए।
फिप्नाले हरेक वर्ष लखन थापाको योगदानलाई स्मरण गर्दै स्मृति दिवस मनाउँदै आएको छ। कार्यक्रमको शुभारम्भ प्रथम शहीद लखन थापाको तस्बिरमा माल्यार्पण तथा दीप प्रज्वलन गर्दै गरिएको थियो। प्रमुख अतिथि शाहले लखन थापाको साहसिक योगदानको उच्च प्रशंसा गर्दै जनजाति, दलित, मधेशी समुदायले आफ्नो अधिकार स्थापित गर्न एकताबद्ध भएर अघि बढ्नुपर्ने आवश्यकता औंल्याएका थिए।
कार्यक्रममा विशेष अतिथि सुशीला श्रेष्ठले लखन थापाको त्याग र बलिदानकाे स्मरण गरेकि थिइन्।
त्यस्तै प्रतिनिधिसभा सदस्य कमला विश्वकर्माले लखन थापालाई केवल एक दिनमात्र सम्झनु पर्याप्त नभएको उल्लेख गर्दै उनको नाममा स्वास्थ्य तथा शैक्षिक संस्थाहरू स्थापना गर्नुपर्ने धारणा राखिन्।
स्मृति दिवसमा संघीय परिषद्की उपसभामुख निमा गोले तामाङ, सामाजिक अभियन्ता केशबराम राई, समीर महर्जन, शेर्पा किदुङका अध्यक्ष तेम्बा शेर्पा, कलाकार संघकी अध्यक्ष बसन्ती राईलगायत विभिन्न वक्ताहरूले मन्तव्य व्यक्त गरेका थिए।
फिप्नाका अध्यक्ष तोरण गुरुङको अध्यक्षतामा सम्पन्न कार्यक्रमको सञ्चालन महासचिव दीपक चौधरीले गरेका थिए। कार्यक्रममा संस्थाका सचिव शान्ति गुरुङ, कोषाध्यक्ष कृष्णमाया महर्जन, महासंघका सल्लाहकार कुलदीप रानामगर तथा नेपाली डायस्पोराका विभिन्न सामाजिक व्यक्तित्वहरूको पनि उपस्थिति रहेको थियो।
