ट्रम्पको व्यापार युद्धबीच एलन मस्कले युरोप र उत्तर अमेरिका बीच ‘शून्य भन्सार’ र ‘मुक्त व्यापार क्षेत्र’को माग गरे
वासिङटन- प्रविधि व्यवसायी एलन मस्कले शनिबार युरोप र अमेरिकाबीच ‘शून्य भन्सार स्थिति’ स्थापना गर्नुपर्ने बताएका छन्। अमेरिकी राष्ट्रपति डोनाल्ड ट्रम्पका सल्लाहकारको रूपमा समेत कार्य गरिसकेका मस्कले ट्रम्पको विदेशी राष्ट्रहरूमाथि व्यापक भन्सार लगाउने निर्णयसँग असहमत जनाउँदै यस्तो विचार राखेका हुन्।
“मेरो विचारमा, युरोप र अमेरिका दुवै मिलेर शून्य भन्सार अवस्थातर्फ जानु पर्छ, जसले युरोप र उत्तर अमेरिका बीच एक प्रकारको मुक्त व्यापार क्षेत्र बनाउनेछ,” मस्कले शनिबार इटालीका दक्षिणपन्थी उपप्रधानमन्त्री माटेओ साल्भिनीले आयोजना गरेको ‘दि लिग कांग्रेस’ कार्यक्रममा भने।
“मानिसहरूलाई पनि स्वतन्त्र रूपमा युरोप र उत्तर अमेरिका बीच रोजगारी वा बसाइको लागि आउजाउ गर्न अनुमति दिनु उपयुक्त हुन्छ। मैले राष्ट्रपति ट्रम्पलाई पनि यही सल्लाह दिएको छु,” मस्कले थपे।
मस्कको यो अभिव्यक्ति त्यतिबेला आएको हो जब ट्रम्पले युरोपेली संघ लगायतका प्रमुख व्यापार साझेदारहरूमाथि २० प्रतिशत भन्सार लगाउने निर्णय सार्वजनिक गरेका छन्।
ट्रम्पको यो घोषणापछि बिहीबार अमेरिकी शेयर बजारमा भारी गिरावट आएको थियो। एस एन्ड पी ५०० करिब ५%, डाउ जोन्स ४% र नास्डाक ६% गिरावट आएको थियो, जुन कोविड महामारीको सुरुवातपछिको सबैभन्दा ठूलो गिरावटमध्ये पर्छ।
ट्रम्पले बुधबार सेतो सदनको कार्यक्रममा भनेका थिए, “अमेरिकालाई अरु राष्ट्रहरूले लुटेको, दोहन गरेको, बलात्कार र शोषण गरेको छ।” उनले आगामी युगलाई “अमेरिकाको सुनौलो युग” हुने दाबी गरे।
तर शेयर बजारमा गिरावट आए पनि ट्रम्प आफ्नै निर्णयमा अडिग छन्। शनिबार ट्रुथ सोसलमा पोस्ट गर्दै उनले चीन र अन्य राष्ट्रहरूले अमेरिका विरुद्ध “असहनीय व्यवहार” गरेको भन्दै लेखे, “यो एउटा आर्थिक क्रान्ति हो, र हामी जित्नेछौं। कडा बन, सजिलो हुने छैन तर नतिजा ऐतिहासिक हुनेछ। हामी अमेरिका फेरि महान बनाउनेछौं!!!”
यता, युरोपेली आयोगकी अध्यक्ष उर्सुला भोन डेर लायनले एक्स (पूर्व ट्विटर) मा लेख्दै युरोपले पनि जवाफ दिन तयार रहेको बताएकी छन्। “हामी सधैं आफ्ना हित र मूल्यहरू जोगाउँछौं। वार्ताको लागि पनि तयार छौं, टकरावबाट वार्तातर्फ जाने हो।”
ट्रम्पले लामो समयदेखि स्वतन्त्र व्यापारको विरोध गर्दै आएका छन्, भने मस्कले शनिबार त्यसको समर्थन गरेका छन्। ह्वाइट हाउस सदन र मस्क दुबैले यस विषयमा प्रतिक्रिया दिएका छैनन्।
