एलन मस्क ट्रम्पको खर्च विधेयकप्रति निराश, भन्छन्: “यसले DOGE को प्रयासलाई कमजोर बनाउँछ”
वाशिङ्टन — प्रसिद्ध उद्योगपति एलन मस्कले राष्ट्रपति डोनाल्ड ट्रम्पको “वन बिग ब्यूटिफुल बिल” प्रति आफ्नो गहिरो निराशा व्यक्त गरेका छन्। उक्त विधेयक हालसालै प्रतिनिधिसभामा रिपब्लिकन सांसदहरूले पारित गरेका थिए।
“साच्चै भन्ने हो भने, म उक्त भारी खर्च विधेयक देखेर निराश भएँ,” मस्कले एक विशेष अन्तर्वार्तामा भनेका छन, “यसले बजेट घाटा घटाउनुको सट्टा बढाउँछ, र DOGE टोलीले गरिरहेको काममाथि नकारात्मक असर पार्छ।”
DOGE का प्रमुखको रूपमा हालसालै मात्र पदबाट पछि हटेका मस्कको यो टिप्पणी ट्रम्पको समर्थनभन्दा फरक रहेको देखिएको छ। ट्रम्पले भने यो विधेयकलाई आफ्नो प्रमुख उपलब्धि भन्दै समर्थन गरेका छन्।
वन बिग ब्यूटिफुल बिल एक्ट प्रतिनिधिसभामा २१५-२१४ मतले पारित भएको हो। सबै डेमोक्र्याट सांसदहरूले र दुई रिपब्लिकन सांसद — थोमस म्यासी (केंटकी) र वारेन डेविडसन (ओहायो) — ले यसविरुद्ध मतदान गरे। हाउस फ्रीडम ककसका अध्यक्ष एन्डी ह्यारिस (मेरील्यान्ड) ले “present” भनी मत दिएका थिए।
यो विधेयक ट्रम्पको सन् २०१७ को कर कटौती विस्तार, टिप, ओभरटाइम तथा सामाजिक सुरक्षामाथिको कर हटाउनेजस्ता वाचा पूरा गर्ने दिशामा महत्वपूर्ण मानिएको छ। यसले झण्डै $१.५ ट्रिलियन सरकारी खर्च कटौती गर्ने दाबी गरिएको छ।
तर अमेरिकी सरकारले २०२५ को आर्थिक वर्षमा हालसम्म $१.०५ ट्रिलियन बढी खर्च गरिसकेको छ, र कुल ऋण $३६ ट्रिलियन नाघिसकेको ट्रेजरी विभागको तथ्यांक छ।
मस्कले DOGE को लक्ष्य सरकारी प्रणालीलाई दक्ष, पारदर्शी र खर्च कटौती गर्नेतर्फ केन्द्रित भएको बताउँदै आएका थिए। उनको भनाइ अनुसार यो नयाँ विधेयकले त्यस्ता प्रयासहरूमा बाधा पुर्याउनेछ।
हाल विधेयक सिनेटमा विचाराधीन अवस्थामा छ र पारित हुन अझै केही अवरोधहरू बाँकी छन्।
