अन्टार्कटिकातर्फ अन्वेषकहरूको यात्रा : एक लाख ३० हजार वर्ष पुरानो बरफको खोजी
न्युयोर्क- फ्रान्सका अन्वेषक म्याथिउ टोर्डुर र हिमनदी विज्ञ हेइडी सेभेस्ट्रे तीन महिनाको कठिन अभियानमा अन्टार्कटिकातर्फ निस्किएका छन्। उनीहरू करिब एक लाख ३० हजार वर्ष पुरानो बरफ खोज्दै छन्, जसले पृथ्वीको जलवायु इतिहास र भविष्य बुझ्न मद्दत गर्नेछ।
दुबैले चङ्गा स्कीसको सहायतामा पृथ्वीको सबैभन्दा चिसो महाद्वीप पार गर्नेछन्। तापक्रम माइनस ५० डिग्रीसम्म झर्न सक्छ। उनीहरूले करिब चार हजार किलोमिटर यात्रा गर्ने योजना बनाएका छन्।
टोर्डुरका अनुसार यो ठाउँ पृथ्वीको सबैभन्दा चिसो, सुक्खा र हावायुक्त भूभाग हो, जहाँ मानिस वा जनावर भेटिँदैन। उनीहरूले बरफको तह मापन गर्न दुईवटा राडार प्रयोग गर्नेछन्।
सेभेस्ट्रेले भनिन्, “हामी दुईदेखि तीन किलोमिटर गहिराइमा रहेको पुरानो बरफ खोज्दैछौं, जब पृथ्वी अहिलेभन्दा करिब तीन डिग्री तातो थियो।” यदि त्यस्तो बरफ फेला परेन भने, त्यसको अर्थ अन्टार्कटिकाको केही भाग पहिले नै पतन भइसकेको हुन सक्छ।
यो अध्ययनले भविष्यमा समुद्री सतह कति बढ्न सक्छ भन्ने अनुमानमा सहयोग पुर्याउनेछ। उनका अनुसार पश्चिम अन्टार्कटिकाको बरफ पग्लिएमा समुद्री सतह चारदेखि छ मिटरसम्म बढ्न सक्छ।
दुवै अन्वेषकको उद्देश्य जलवायु परिवर्तनबारे चेतना फैलाउनु पनि हो। उनीहरूले भने, “अझै पनि ढिलो भएको छैन, कार्बन उत्सर्जन घटाउन र जीवाश्म इन्धनको प्रयोग कम गर्न सके बरफ र हाम्रो भविष्य दुबै जोगिन सक्छ।”
