भ्रष्टाचारसम्बन्धी तीन मुद्दामा शेख हसिनालाई २१ वर्षको जेल सजाय

ढाका – बङ्गलादेशकी पूर्व प्रधानमन्त्री शेख हसिनालाई ढाकाको विशेष अदालतले भ्रष्टाचार र षड्यन्त्रसँग सम्बन्धित तीन मुद्दामा दोषी ठहर गर्दै २१ वर्षको जेल सजाय सुनाएको छ। प्रत्येक मुद्दामा सात–सात वर्षका दरले सजाय तोकिएको हो।

बङ्गलादेशको भ्रष्टाचार विरोधी आयोगले सरकारी प्लट गैरकानूनी रूपमा बाँडेको आरोपमा हसिना र उनका परिवारविरुद्ध छ वटा मुद्दा दायर गरेको थियो। बाँकी तीन मुद्दाको फैसला डिसेम्बर १ मा हुने बताइएको छ। अदालतले उनका छोरा सजीब वाजेद जोय र छोरी साइमा वाजेद पुतुललाई पनि पाँच–पाँच वर्षको कैद सजाय सुनाएको छ।

यसअघि अन्तर्राष्ट्रिय अपराध न्यायाधिकरणले सन् २०२४ मा सरकार विरोधी आन्दोलन दमनको क्रममा मानवता विरुद्धका अपराधमा हसिनालाई मृत्युदण्ड सुनाइसकेको थियो। हाल उनी र उनका परिवार फरार अवस्थामा छन्।

बङ्गलादेशको अन्तरिम सरकारले भारतलाई हसिनाको सुपुर्दगीका लागि अनुरोध गरेको छ, जसबारे नयाँदिल्लीले अध्ययन गरिरहेको जनाएको छ। सन् २०२४ मा विद्यार्थी नेतृत्वको विद्रोहपछि हसिनाले पद त्याग गरी भारतमा शरण लिएकी थिइन्। त्यसपछि नोबेल विजेता मुहम्मद युनुसको नेतृत्वमा अन्तरिम सरकार गठन भएको हो।

यो घटनाले बङ्गलादेशको राजनीतिक स्थिरता, न्यायिक प्रक्रिया र अन्तर्राष्ट्रिय सम्बन्धमा गहिरो प्रभाव पार्ने देखिएको छ।