ट्रम्पद्वारा डेमोक्र्याटिक सांसद हेनरी कुएलरलाई माफी, विवाद पुनः चर्कियो
वासिङ्टन- अमेरिकी राष्ट्रपति डोनाल्ड ट्रम्पले टेक्सासका डेमोक्र्याटिक सांसद हेनरी कुएलरलाई घूसखोरीसम्बन्धी मुद्दामा बिना शर्त आममाफी दिएका छन्। बुधबार आफ्नो ट्रुथ सोसल प्लेटफर्ममार्फत ट्रम्पले कुएलरलाई “पूर्ण आममाफी” घोषणा गर्दै उनको “भयानक सपना अन्त्य भएको” टिप्पणी गरेका थिए।
कुएलर र उनकी श्रीमतीमाथि अजरबैजान सरकारको आंशिक स्वामित्वमा रहेको तेल तथा ग्यास कम्पनीबाट सयौं हजार डलर घूस लिएको आरोप थियो। उनीहरूले ती आरोपहरूको खण्डन गर्दै कानुनी लडाइँ जारी राखेका थिए। माफीपछि कुएलरले सामाजिक सञ्जाल एक्समा प्रतिक्रिया दिँदै राष्ट्रपति ट्रम्पलाई “जबरदस्त नेतृत्व” र “तथ्य हेर्ने दृष्टिकोण”का लागि धन्यवाद व्यक्त गरे।
ट्रम्पले पूर्व राष्ट्रपति बाइडेनको प्रशासनले राजनीतिक प्रतिद्वन्द्वीविरुद्ध न्याय प्रणाली प्रयोग गरेको आरोप दोहोर्याए पनि त्यसको प्रमाण प्रस्तुत गरेका छैनन्। पदभार ग्रहण गरेदेखि ट्रम्पले उच्च ओहोदाका व्यक्तिहरूलाई सजाय मिनाह गर्ने क्रम जारी राखेका छन्।
यसअघि सोमबार होन्डुरसका पूर्व राष्ट्रपति जुआन ओर्लान्डो हर्नान्डेजलाई पश्चिम भर्जिनियाको जेलबाट रिहा गरिएको थियो। गत फेब्रुअरीमा इलिनोइसका गभर्नर रड ब्लागोजेभिचलाई राजनीतिक भ्रष्टाचारको मुद्दामा माफी दिइएको थियो।
