ह्यानोभरमा हिमपातको कहर: चिसोले जनजीवन प्रभावित र यातायात ठप्प

जर्मनी- जर्मनीको ह्यानोभर सहरमा शुक्रबार बिहानैदेखि भएको भारी हिमपातले जनजीवनलाई नराम्ररी प्रभावित बनाएको छ। ‘स्टोर्म एली’ नामक शक्तिशाली हिउँदे आँधीका कारण ह्यानोभर र आसपासका क्षेत्रहरू हिउँको सेतो च्यादरले ढाकिएका छन्। बिहानको मिर्मिरेमै बाक्लो हिउँ परेपछि सहरको मध्यभागमा गुड्ने सडक यातायात र ट्राम सेवाहरूमा गम्भीर अवरोध देखिएको छ। हिउँका कारण सडकहरू चिप्ला भएका छन् भने दृश्यता निकै कम हुँदा चालकहरूलाई सवारी चलाउन कठिन भएको छ।

यस हिमपातको सबैभन्दा ठुलो असर रेल सेवामा परेको छ। ह्यानोभर रेल नेटवर्कको एक प्रमुख केन्द्र भएकाले यहाँको अवरोधले उत्तर जर्मनीभरिकै लामो दुरीका रेल सेवाहरू स्थगित गर्नुपरेको छ। रेल सञ्चालक कम्पनी डयचे बान ले सुरक्षाका कारण ह्यानोभर हबबाट चल्ने सेवाहरू दिउँसोसम्मका लागि बन्द गरेको छ। स्थानीय प्रशासनले भारी हिमपात र ठन्डी हावाका कारण रुखका हाँगाहरू भाँचिने र बिजुली आपूर्तिमा समेत समस्या आउन सक्ने चेतावनी दिँदै नागरिकहरूलाई अनावश्यक रूपमा घरबाहिर ननिस्कन आग्रह गरेको छ।

जर्मन मौसम विभागले आगामी केही दिनसम्म तापक्रम झनै घटेर माइनस १७ डिग्री सेल्सियससम्म पुग्न सक्ने प्रक्षेपण गरेको छ। हिमपातका कारण विद्यालयहरू बन्द गरिएका छन् भने सडकमा जमेको हिउँ हटाउन डोजर र सफाइ कर्मचारीहरू निरन्तर खटिरहेका छन्। यो मौसमी प्रतिकूलताले गर्दा जर्मनीको उत्तरी र पूर्वी भेगका यातायात तथा ढुवानी सेवामा व्यापक ढिलाइ भएको छ।