इरानसँग तनाव बढेपछि कतारबाट अमेरिकी सैनिक हटाउन थालियो
न्युयोर्क- इरानमाथि अमेरिकी सैन्य कारबाहीको खतरा बढ्दै जाँदा अमेरिका र बेलायतले कतारस्थित आफ्नो सबैभन्दा ठुलो सैन्य आधारशिविर ‘अल-अदेद’ बाट सैनिकहरू सार्न थालेका छन्। इरानमा जारी सरकार विरोधी प्रदर्शनमा २,४०० भन्दा बढी मारिएपछि राष्ट्रपति ट्रम्पले कडा कदम चाल्ने चेतावनी दिएका थिए। सम्भावित इरानी प्रत्याक्रमणबाट बच्न “पूर्वसावधानी” स्वरूप सैनिकहरूको संख्या घटाउन थालिएको अधिकारीहरूले बताएका छन्।
यसैबीच, इरानले आफ्नो आकाशमार्गमा उडानहरू रोकेको छ भने एयर इन्डिया र लुफ्थान्सा जस्ता एयरलाइन्सले इरानको बाटो प्रयोग गर्न छाडेका छन्। नेपालको परराष्ट्र मन्त्रालयले पनि इरानमा रहेका नेपालीलाई सतर्क रहन र स्थिति सामान्य नभएसम्म त्यसतर्फ यात्रा नगर्न सुझाव दिएको छ। ट्रम्पले सैन्य विकल्प खुला रहेको बताएपछि मध्यपूर्वमा युद्धको त्रास छाएको छ।
