ईयू र मर्कोसुरबीच ऐतिहासिक स्वतन्त्र व्यापार सम्झौता: २५ वर्षपछिको सफलता
असुन्सिओन- युरोपेली सङ्घ (ईयू) र दक्षिण अमेरिकी राष्ट्रहरूको समूह ‘मर्कोसुर’ बीच शनिबार ऐतिहासिक स्वतन्त्र व्यापार सम्झौतामा हस्ताक्षर भएको छ। पाराग्वेको राजधानी असुन्सिओनमा आयोजित एक समारोहका बीच सम्पन्न यो सम्झौताले विगत २५ वर्षदेखि चलिरहेको जटिल वार्तालाई सुखद अन्त्य दिएको छ। विश्वभर बढ्दो संरक्षणवाद र अमेरिकी आयात शुल्क नीतिको दबाबका बीच भएको यो सम्झौतालाई युरोप र दक्षिण अमेरिका दुवैले ठुलो भू-राजनीतिक विजयका रूपमा लिएका छन्।
यस सम्झौताले करिब ७० करोड उपभोक्तालाई जोड्दै विश्वकै ठुलोमध्येको एक स्वतन्त्र व्यापार क्षेत्र निर्माण गर्नेछ। सम्झौताअनुसार अर्जेन्टिना र ब्राजिलको गोमांसदेखि जर्मनीका कार र मेसिनरीसम्मका ९० प्रतिशतभन्दा बढी वस्तुमा भन्सार शुल्क हटाइनेछ। युरोपेली आयोगकी अध्यक्ष उर्सुला भोन डेर लेयनले यसलाई संरक्षणवाद विरुद्धको स्पष्ट सन्देश भन्दै स्वागत गरेकी छन्। यद्यपि, सम्झौता पूर्ण रूपमा कार्यान्वयनमा आउनुअघि युरोपेली संसद्बाट अनुमोदन हुन बाँकी छ, जहाँ केही कृषि लबी र फ्रान्सजस्ता देशहरूको राजनीतिक विरोध अझै कायम छ।
