भेनेजुएलालाई अमेरिकाको ‘अल्टिमेटम’: कुरा नमाने सैन्य कारबाहीको चेतावनी

न्युयोर्क- अमेरिकी विदेशमन्त्री मार्को रुबियोले भेनेजुएलाको अन्तरिम नेतृत्वलाई स्पष्ट भाषामा चेतावनी दिएका छन्। बुधबार सिनेटको समितिमा बोल्दै उनले भनेका छन्— यदि भेनेजुएलाको नेतृत्व अमेरिकी अपेक्षा र लक्ष्य अनुसार अघि बढेन भने भविष्यमा सैन्य कारबाही गर्न पनि ट्रम्प प्रशासन तयार छ। उनले अहिले नै अमेरिका युद्धमा होमिएको होइन, तर अन्तिम विकल्पका रूपमा बल प्रयोगलाई नकार्न नसकिने बताए।

रुबियोले पूर्वराष्ट्रपति निकोलस मदुरोलाई हटाउनु र लागुऔषध तस्करविरुद्धको कारबाही कानुनसम्मत भएको जिकिर गरे। उनले वर्तमान कार्यवाहक राष्ट्रपति डेल्सी रोड्रिगेजसँग आफ्ना मागहरू स्पष्ट राखेका छन्। अमेरिकाका सर्तहरू सिधा छन्: भेनेजुएलाको ऊर्जा क्षेत्र अमेरिकी कम्पनीका लागि खोल्नुपर्ने, तेल बेचेको पैसाले अमेरिकी सामान नै किन्नुपर्ने र क्युबालाई दिँदै आएको सहुलियत तेल रोक्नुपर्ने।

यद्यपि, कूटनीतिक सम्बन्ध सुधार्ने प्रयासस्वरूप सन् २०१९ देखि बन्द रहेको अमेरिकी दूतावास पुनः खोल्ने तयारी भइरहेको जानकारी पनि उनले दिए। भेनेजुएलाले हालै राजनीतिक बन्दीहरू रिहा गरेर सकारात्मक संकेत दिएको छ, जसको राष्ट्रपति ट्रम्पले प्रशंसा गरेका छन्।