म्याग्दीमा स्वतन्त्र उम्मेदवार महावीर पुनको फराकिलो अग्रता
काठमाडौं – म्याग्दी जिल्लाको प्रतिनिधिसभा सदस्य निर्वाचनमा स्वतन्त्र उम्मेदवार महावीर पुनले आफ्नो फराकिलो अग्रतालाई कायमै राखेका छन्। मुख्य निर्वाचन अधिकृतको कार्यालयका अनुसार मतगणनाको पछिल्लो नतिजामा पुनले अन्य राजनीतिक दलका उम्मेदवारलाई निकै पछि पारेका हुन्।
हालसम्म धवलागिरी र मालिका गाउँपालिकाका सबै वडासहित मंगला गाउँपालिकाका १, २ र ३ नम्बर वडाको मतगणना सम्पन्न भएको छ। कुल १३ हजार ७२२ मत गणना हुँदा महावीर पुनले ७ हजार ७८७ मत प्राप्त गरेका छन्।
उनका निकटतम प्रतिस्पर्धी नेकपा एमालेका हरिकृष्ण श्रेष्ठले ३ हजार ५६ मत पाएका छन्। त्यस्तै, नेकपाका अर्जुन थापाले १ हजार ९९३ मत र नेपाली कांग्रेसका कर्णबहादुर भण्डारीले १ हजार ९२६ मत प्राप्त गरेका छन्। पुन र श्रेष्ठबीचको मतान्तर ४ हजार ७३१ पुगेको छ। अहिले पनि मतगणना जारी छ र पुनको अग्रता झन्झन् बढ्दै गएको देखिएको छ।
