तेल बजार स्थिर बनाउन प्रमुख शक्ति राष्ट्रहरूको बैठक, रणनीतिक भण्डार प्रयोग गरिने

पेरिस — मध्यपूर्वमा जारी भीषण युद्धका कारण विश्व ऊर्जा बजारमा उत्पन्न अस्थिरता नियन्त्रण गर्न प्रमुख औद्योगिक राष्ट्रहरू (जी-७) का अर्थमन्त्रीहरूले आपतकालीन छलफल सुरु गर्ने भएका छन्। फ्रान्सको अध्यक्षतामा सोमबार हुने यस बैठकमा तेलको मूल्य वृद्धिलाई रोक्न ‘रणनीतिक तेल भण्डार’ (Strategic Oil Reserve) बजारमा ल्याउने विषयमा गम्भीर विचार विमर्श हुनेछ।

अमेरिका र इजरायलले इरानमाथि सुरु गरेको सैन्य कारबाहीपछि खाडी क्षेत्रबाट हुने तेल आपूर्तिमा अवरोध आउने डरले विश्व बजारमा कच्चा तेलको मूल्य आकाशिएको छ। यसको प्रत्यक्ष असर विश्वभरका सेयर बजार र उपभोग्य वस्तुको मूल्यमा देखिएको छ। ऊर्जा संकटको जोखिमलाई मध्यनजर गर्दै क्यानडा, जर्मनी, इटाली, जापान, बेलायत र अमेरिकाले अन्तर्राष्ट्रिय ऊर्जा सहयोग संयन्त्रमार्फत संयुक्त कदम चाल्ने तयारी गरेका हुन्।

अमेरिकी राष्ट्रपति डोनाल्ड ट्रम्पले भने तेलको मूल्य बढ्नुलाई इरानको आणविक खतरा अन्त्य गर्नका लागि तिर्नुपर्ने ‘सानो मूल्य’ का रूपमा टिप्पणी गरेका छन्। उनले रणनीतिक भण्डार अहिल्यै प्रयोग नगर्ने संकेत दिए पनि अन्य सदस्य राष्ट्रहरूले भने बजारलाई थप बिग्रन नदिन ९० दिनको आयात बराबरको आपतकालीन भण्डार प्रयोग गर्नुपर्नेमा जोड दिइरहेका छन्। सन् १९७३ को तेल संकटपछि यस्ता ठूला देशहरूले ऊर्जा सुरक्षा सुनिश्चित गर्न यस्तो संयन्त्रको अभ्यास गर्दै आएका छन्।