आकाशमै गडबडी भएपछि एयर इन्डियाको जहाज आयरल्यान्डमा अवतरण
न्यूयोर्क- न्यूयोर्कबाट भारतको नयाँ दिल्लीका लागि उडेको एयर इन्डियाको विमानमा प्राविधिक समस्या देखिएपछि आयरल्यान्डमा आकस्मिक अवतरण गरिएको छ। शंकास्पद त्रुटि देखिएपछि चालक दलले आइतबार बिहान श्यानन विमानस्थलमा जहाजलाई सुरक्षित रूपमा अवतरण गराएका हुन्।
एयर इन्डियाका प्रवक्ताले यात्री र चालक दलको सुरक्षालाई ध्यानमा राख्दै उडान मोड्ने निर्णय गरेको बताए। अहिले जहाजको प्राविधिक जाँच भइरहेको छ। कम्पनीले यात्रुलाई परेको असुविधाप्रति माफी माग्दै विना थप शुल्क अर्को टिकट काट्न वा पूरै पैसा फिर्ता लिन सक्ने व्यवस्था गरेको छ।
यसैबीच, एयर इन्डिया र एयर इन्डिया एक्सप्रेसले मार्च १६ मा पश्चिम एसियाका लागि ४८ वटा उडान सञ्चालन गर्दैछन्। साथै, युएई र साउदी अरबका लागि थप २६ वटा उडान हुनेछन् भने अन्य देशका नियमित उडानहरू आफ्नै समयमा हुने कम्पनीले स्पष्ट पारेको छ।
