हजारौँ सैनिकसहितको अमेरिकी युद्धपोत मध्यपूर्व जाँदै, सिंगापुर नजिक पुग्यो
न्युयोर्क- हजारौँ नौसैनिक लिएर मध्यपूर्व जाँदै गरेको अमेरिकी युद्धपोत ‘युएसएस त्रिपोली’ सिंगापुर नजिक पुगेको छ। मंगलबार बिहानको समुद्री तथ्याङ्कअनुसार यो जहाज दक्षिण चीन सागरको किनार हुँदै अघि बढिरहेको हो।
अधिकारीहरूका अनुसार यो जहाजमा जापानको ओकिनावामा रहेको द्रुत प्रतिक्रिया टोलीका २ हजार २ सय सैनिक छन्। अमेरिकी रक्षा मन्त्रालयको आदेशमा उनीहरूलाई मध्यपूर्व पठाइएको हो। तर, उनीहरूलाई ठ्याक्कै कहाँ र कुन कामका लागि खटाइएको हो भन्ने खुलाइएको छैन।
सुरक्षाका कारण व्यस्त समुद्री मार्गमा जहाजको अवस्था देखाउने प्रणाली खुला राखिएको छ। करिब ८५० फिट लामो र ४५ हजार टन क्षमताको यो युद्धपोत सानो विमानस्थल जस्तै छ। यसले ‘एफ-३५’ लडाकु विमान र सेना ओसार्ने साधन बोक्न सक्छ। मार्च ११ मा ओकिनावाबाट हिँडेको यो जहाज करिब २२ माइल प्रतिघण्टाको गतिमा अघि बढिरहेको छ।
