स्पेनमा एक शताब्दी पछि दुर्लभ खग्रास सूर्यग्रहण अवलोकन
स्पेन- एक शताब्दीभन्दा लामो समयपछि स्पेनमा खग्रास सूर्यग्रहण देखा परेको छ। बुधबार देखिएको यो दुर्लभ खगोलीय घटना हेर्न सहरदेखि गाउँसम्म लाखौँ मानिस भेला भएका थिए। सूर्य, चन्द्रमा र पृथ्वी एउटै सीधा रेखामा पर्दा केही समयका लागि दिनमै अँध्यारो छाएको थियो, जुन दृश्य हेर्न स्पेन, पोर्चुगल र आइसल्यान्ड लगायतका स्थानबाट मानिसहरू पुगेका थिए।
मानिसहरू ल्यानका कुर्सी, छाता र विशेष चश्मा लिएर खुला स्थानमा जम्मा भएका थिए। आकाश अँध्यारिँदै जाँदा भीडले ताली बजाएर खुसी साटेका थिए। चन्द्रमाले सूर्यलाई पूरै ढाकेपछि दिन पनि रातजस्तै देखिएको थियो।
स्पेनको प्राचीन सहर मेडिनसेलीबाट ग्रहण हेरेकी रोजा सेलिबर्टीले प्रत्यक्ष खग्रास सूर्यग्रहणको अनुभवलाई कुनै पनि तस्बिर वा भिडियोसँग तुलना गर्न नसकिने बताइन्। ग्रहणको मार्ग उत्तरी तथा मध्य स्पेन, पोर्चुगल हुँदै भूमध्यसागरमा गएर टुङ्गिएको थियो। त्यसअघि ग्रहणले ग्रिनल्यान्ड र आइसल्यान्डका केही भाग पनि पार गरेको थियो।
आइसल्यान्डको पश्चिमी तटमा ग्रहणको अवधि दुई मिनेट ३० सेकेन्डभन्दा कम हुने अनुमान गरिएको थियो भने स्पेन प्रवेश गर्दा यो अवधि एक मिनेट वा सोभन्दा कम भएको थियो। स्पेनमा ग्रहण हेर्न करिब पाँच लाख पर्यटक आउने अनुमान थियो। ए कोरुना, बिलबाओ जस्ता उत्तरी सहरहरूमा होटलको माग अत्यधिक बढेको थियो। सुरक्षाका लागि ३५० आधिकारिक अवलोकनस्थल तयार पारिएको थियो भने ३३ हजार ५०० भन्दा बढी सुरक्षाकर्मी परिचालन गरिएको थियो।
ग्रहणको दिन धेरै क्षेत्रमा तापक्रम ३५ डिग्री सेल्सियसभन्दा माथि पुगेको थियो, र केही स्थानमा डढेलोको जोखिम पनि थियो। केही साताअघि मात्र स्पेनको इतिहासकै ठूलो डढेलोले ५०० वर्गकिलोमिटर क्षेत्र प्रभावित बनाएको थियो।
आइसल्यान्डको रेक्जाविकमा बादल लागेको भए पनि सयौँ मानिस ऐतिहासिक हलग्रिमस्किर्कजा चर्चअगाडि भेला भएर ग्रहणको अनुभव लिए। त्यहाँ अँध्यारो छाएपछि मानिसहरूले मोबाइलको प्रकाश बालेर खुसी व्यक्त गरेका थिए। आंशिक ग्रहण हेर्नसमेत विशेष चश्मा चाहिने भएकाले यसको माग उच्च थियो, र धेरै पसलहरूमा चश्मा सकिएको थियो।
ग्रिनल्यान्ड नजिकैको समुद्रमा एमएस स्पिट्सबर्गेनका कप्तान सेभेरे रुडले यात्रुहरूलाई ग्रहण देखाउन विशेष तयारी गरेका थिए। आइसल्यान्डमा सन् १९५४ पछि पहिलो खग्रास सूर्यग्रहण देखिएको हो, र रेक्जाविकबाट सन् १४३३ पछि पहिलोपटक देखिएको थियो। यसले गर्दा त्यहाँका होटलहरूको मूल्य दोब्बरसम्म बढेको थियो। बेलायतका विभिन्न भागमा पनि ९० प्रतिशतभन्दा बढी सूर्य ढाकिएको थियो, जुन सन् १९९९ पछिकै सबैभन्दा उल्लेखनीय ग्रहण थियो।
