अमेरिकाबाट देशनिकाला गरिएका नागरिक एल साल्भाडोरको जेलमा बेपत्ता
न्युयोर्क- ह्युमन राइट्स वाचको नयाँ प्रतिवेदनअनुसार, अमेरिकाबाट देशनिकाला (Deport) गरिएका साल्भाडोरन नागरिकहरूलाई एल साल्भाडोर पुगेपछि जथाभावी थुनामा राखिएको छ र उनीहरू त्यहाँको जेल प्रणालीमा बेपत्ता भएका छन्।
जनवरी २०२५ मा अमेरिकी राष्ट्रपति डोनाल्ड ट्रम्पको दोस्रो कार्यकाल सुरु भएयता ९ हजारभन्दा बढी साल्भाडोरन नागरिकलाई अमेरिकाले फिर्ता पठाएको छ। तीमध्ये धेरैलाई भेनेजुएलाका नागरिकहरूसँगै ‘सेकोट’ (CECOT) नामक विशाल जेलमा राखिएको छ। पक्राउ परेकाहरूले आफ्ना परिवार वा वकिलसँग कुनै कुराकानी गर्न पाएका छैनन्।
ह्युमन राइट्स वाचले यसलाई ‘बाध्यकारी बेपत्ता’ भनेको छ। ट्रम्प प्रशासनले उनीहरूमध्ये केही ‘एमएस-१३’ ग्याङका सदस्य भएको दाबी गरे पनि, ९ हजारमध्ये करिब १०.५ प्रतिशत मात्र अमेरिकामा हिंस्रक अपराधमा दोषी पाइएका थिए। यता, एल साल्भाडोरका जेलहरूमा पहिलेदेखि नै मानवअधिकार उल्लंघनका घटना भइरहेका छन् भने परिवारका सदस्यहरू आफ्ना मान्छे कहाँ र कस्तो अवस्थामा छन् भन्ने जानकारी नपाएर छटपटाइरहेका छन्।
