निजी जेलका पूर्व हाकिम डेभिड भेन्चुरेलाले सम्हाल्ने भए ‘आइस’को नेतृत्व
न्युयोर्क- अमेरिकाको अध्यागमन तथा भन्सार प्रवर्तन विभाग (आइस) को नेतृत्व अब डेभिड भेन्चुरेलाले गर्ने भएका छन्। निजी जेल सञ्चालन गर्ने कम्पनी ‘जियो ग्रुप’का पूर्व कार्यकारी भेन्चुरेलालाई ट्रम्प प्रशासनले कार्यवाहक प्रमुख बनाउन लागेको हो।
अहिलेका प्रमुख टोड लायन्सले यो महिनाको अन्त्यमा अवकाश पाएपछि उनले पद सम्हाल्नेछन्। भेन्चुरेलाले यसअघि सन् २०११ र २०१२ मा पनि आइसमै रहेर मानिसहरूलाई देश निकाला गर्ने विभागमा काम गरेका थिए। जियो ग्रुपमा हुँदा उनले कम्पनीको व्यापार बढाउन र नयाँ ठेक्काहरू दिलाउन मुख्य भूमिका खेलेका थिए।
भेन्चुरेलाको नियुक्तिलाई लिएर अधिकारवादीहरूले भने चिन्ता जनाएका छन्। निजी कम्पनीको मान्छे सरकारी पदमा आउँदा जेल सञ्चालकहरूलाई झन् फाइदा पुग्ने उनीहरूको भनाइ छ। ट्रम्प प्रशासनले अहिले आप्रवासीहरूलाई ठूलो संख्यामा देश निकाला गर्ने योजना बनाइरहेको छ। यसका लागि ९२ हजारभन्दा बढी मानिस राख्न मिल्ने गरी नयाँ हिरासत केन्द्रहरू बनाउने तयारी भइरहेका बेला यो परिवर्तन भएको हो।
