आप्रवासी लखेट्ने डरले रित्तियो टेक्सासको एउटा बस्ती

टेक्सास- टेक्सासको पोर्ट इजाबेल सहरमा एउटा अचम्मको दृश्य देखियो। वर्षौंदेखि बसिरहेका आप्रवासी परिवारहरूले धमाधम आफ्ना दराज, सोफा र फ्रिज बाहिर निकालेर घर छाडे। केही हप्तामै हाँसखेल भइरहने त्यो बस्ती अहिले सुनसान भएको छ। यो सबै एउटा चिठीका कारण सुरु भएको हो।

त्यहाँको आवास कार्यालयले स्थानीयलाई एउटा चिठी पठायो। जसमा ट्रम्प सरकारको नयाँ नियम आउँदै गरेको र परिवारमा एकजना मात्रै अवैध सदस्य भए पनि सबैले घर छाड्नुपर्ने उल्लेख थियो। पछि कार्यालयले त्यो कुरा गल्ती भएको भन्दै स्पष्टीकरण त दियो, तर त्यतिन्जेल आधाभन्दा बढी मानिसले घर छाडिसकेका थिए।

अहिले यो बस्ती ‘भूत घर’ जस्तो बनेको छ। बालबालिकाहरू खेल्ने ठाउँ खाली छ। मानिसहरू समातिने डरले गर्दा महँगो कोठा र स-साना ट्रेलरमा कोचिएर बस्न बाध्य छन्। कतिपय परिवारका छोराछोरी अमेरिकी नागरिक नै हुन्, तर आमाबुबाका कारण उनीहरू पनि घरबारविहीन भएका छन्।

ट्रम्प प्रशासनले ल्याउन लागेको यो नयाँ नियमले अमेरिकाभरि करिब ८० हजार मानिसलाई घरबाट निकाल्न सक्ने अनुमान छ। यसअघि परिवारमा कोही अवैध सदस्य भए उसले आफ्नो भागको पूरा भाडा तिरेर बस्न पाउने नियम थियो। पोर्ट इजाबेलको यो घटनाले नयाँ नियम लागू भएपछि अमेरिकाका अन्य सहरमा कस्तो असर पर्ला भन्ने एउटा नमुना देखाएको छ।