अमेरिकामा अध्यागमन धरपकड रोकियो, तर बालबालिकामा अझै छ डरको चोट
न्युयोर्क- अमेरिकाको मिनेसोटामा आप्रवासीहरू विरुद्ध गरिएको ठूलो धरपकड रोकिएको महिनौँ भइसक्यो। तर, त्यहाँका साना बालबालिकाहरूमा त्यसले पारेको मानसिक असर र डर अझै हट्न सकेको छैन।
‘अपरेशन मेट्रो सर्ज’ नाम दिइएको उक्त धरपकडका क्रममा चार हजारभन्दा बढी मानिस पक्राउ परेका थिए। त्यस बेला अधिकारीहरूले गोली चलाउँदा दुई जनाको ज्यान समेत गएको थियो। प्रहरीको डरले कतिपय बालबालिकाहरू लामो समयसम्म विद्यालय नगई घरभित्रै लुकेर बस्न बाध्य भए। केही बालबालिकाहरूलाई त पक्राउ गरेर टेक्सासको हिरासत केन्द्रसम्म पुर्याइएको थियो।
अहिले विद्यालयहरू पूर्ण रूपमा सञ्चालनमा आए पनि बालबालिकाहरूमा डराउने, एक्लै सुत्न नसक्ने र खान मन नगर्ने जस्ता समस्या देखिएका छन्। विद्यालयका सामाजिक कार्यकर्ता निकोल हर्जले बालबालिकाहरू अझै पनि सुरक्षित महसुस गर्न सकिरहेका छैनन् भन्ने बताए। उनीहरूको यो मानसिक तनाव कम गर्न अहिले विद्यालयहरूमा थेरापी कुकुरहरूको समेत प्रयोग गरेर उपचार गर्न थालिएको छ।
विज्ञ रेबेका पार्लाकियनका अनुसार यस्तो डरलाग्दो वातावरणले साना बालबालिकाको मस्तिष्कको विकासमा समेत गम्भीर र स्थायी असर पार्न सक्छ। अमेरिकामा लाखौँ बालबालिकाहरू आफ्ना आमाबुबा जुनसुकै बेला समातिने वा देश निकाला हुने चिन्तामा बाँचिरहेका छन्। धरपकड रोकिए पनि उनीहरूको मनबाट त्यो डर हट्न अझै धेरै समय लाग्ने देखिएको छ।
