ट्रम्प प्रशासनलाई ठूलो धक्का: गभर्नर वाल्जविरुद्धको अनुसन्धान अदालतद्वारा रोक्का
न्युयोर्क- अमेरिकाको एक सङ्घीय अदालतले मिनेसोटाका गभर्नर टिम वाल्ज र अन्य अधिकारीहरूविरुद्ध अनुसन्धान गर्ने ट्रम्प प्रशासनको प्रयासलाई रोकिदिएको छ।
सङ्घीय न्यायाधीश प्याट्रिक शिल्ट्जले न्याय विभागले आफ्नो शक्तिको दुरुपयोग गरेको बताए। अवैध आप्रवासीहरूविरुद्धको संघीय अभियानमा सहयोग नगरेका कारण राज्यका अधिकारीहरूसँग प्रतिशोध साध्न र दुःख दिन खोजिएको फैसलामा उल्लेख छ।
यो विवाद गत जनवरीदेखि बढ्दै गएको हो। मिनेसोटामा संघीय आप्रवासी अधिकारीहरू र प्रदर्शनकारीहरूबीच झडप हुँदा दुई जनाको मृत्यु भएको थियो। राष्ट्रपति डोनाल्ड ट्रम्पले गभर्नर वाल्जले प्रदर्शनकारीलाई उक्साएको आरोप लगाउँदै उनीहरूको सरकारी रेकर्ड र पत्रचार माग गरेका थिए। वाल्ज सन् २०२४ को चुनावमा कमला ह्यारिसका तर्फबाट उपराष्ट्रपतिको उम्मेदवार थिए।
न्यायाधीश शिल्ट्जले न्याय विभागसँग वाल्ज र अन्य अधिकारीविरुद्ध अनुसन्धान गर्ने कुनै ठोस आधार नभएको स्पष्ट पारे। संघीय आप्रवासी कानुन कार्यान्वयनका लागि आफ्नो स्रोत साधन खर्च नगर्ने अधिकार मिनेसोटा राज्यसँग सुरक्षित रहेको उनले बताए।
अदालतको यो फैसलापछि गभर्नर वाल्जले यसलाई कानुनी शासन र लोकतन्त्रको जित भनेका छन्। उनले ट्रम्प प्रशासनले राजनीतिक विरोधीहरूलाई तारो बनाउन न्याय प्रणालीको दुरुपयोग गरिरहेको आरोप लगाए। मिनेसोटाका महान्यायाधिवक्ता कीथ एलिसनले पनि राजनीतिक पूर्वाग्रह राखेर आपराधिक अनुसन्धान गरिनु सबै अमेरिकीका लागि चिन्ताको विषय भएको बताए।
