हैटी र सिरियाली आप्रवासीको सुरक्षा हटाउने सर्वोच्चको निर्णय: न्यूयोर्क र म्यासाचुसेट्सका गभर्नरहरू आक्रोशित
न्यूयोर्क – अमेरिकी सर्वोच्च अदालतले हैटी र सिरियाका नागरिकहरूलाई दिइँदै आएको अस्थायी संरक्षित स्थिति (टिपीएस) हटाउने ट्रम्प प्रशासनको नीतिलाई सदर गरिदिएको छ। अदालतको यो निर्णयपछि डेमोक्र्याट नेताहरू र ‘ब्लु स्टेट’ (डेमोक्र्याटिक बाहुल्यता भएका राज्य) का गभर्नरहरू आक्रोशित बनेका छन्।
सर्वोच्च अदालतले ६-३ को बहुमतबाट हैटी र सिरियाली नागरिकहरूले आफ्नो कानुनी हैसियत बचाउन संघीय अदालतमा अपिल गर्न नपाउने फैसला सुनाएको हो। यसैगरी, सीमाबाट फर्काइएका आप्रवासीहरूले अमेरिकामा शरणका लागि आवेदन दिन नपाउने अर्को निर्णय पनि अदालतले गरेको छ।
यो फैसला सार्वजनिक भएलगत्तै न्यूयोर्ककी गभर्नर क्याथी होकुलले कडा विरोध जनाइन्। उनले आप्रवासन अधिकारीहरू (आईस) लाई रोक्न केही ‘संवेदनशील स्थानहरू’ तोक्ने र आप्रवासी समात्न आउने एजेन्टहरूलाई मास्क लगाउन प्रतिबन्ध लगाउने घोषणा गरेकी छिन्। उनले न्यूयोर्कले आफ्ना नागरिकको रक्षाका लागि लड्ने बताइन्। न्यूयोर्कका मेयर जोहरान मामदानीले पनि प्रभावित आप्रवासीहरूलाई सहयोग गर्न नि:शुल्क कानुनी हटलाइन सुरु गरेका छन्।
म्यासाचुसेट्सकी गभर्नर मउरा हिलीले पनि यो निर्णयको आलोचना गर्दै यसले परिवार, अर्थतन्त्र र समुदायमा ठूलो असर पुर्याउने बताइन्। रिपब्लिकन सांसद माइक ललरले समेत यो कदमको विरोध गरेका छन्। उनले अमेरिकी स्वास्थ्य क्षेत्रमा हजारौँ हैटीली नागरिक कार्यरत रहेकाले यो निर्णयले अस्पताल र नर्सिङ होमहरूमा संकट निम्त्याउने चेतावनी दिए।
अर्कोतर्फ, ह्वाइट हाउस र गृह मन्त्रालयले भने अदालतको यो फैसलालाई कानुनको जित भन्दै स्वागत गरेका छन्। उनीहरूले अस्थायी सुरक्षा सधैँका लागि नभई निश्चित समयका लागि मात्रै भएको दाबी गरे।
